BINULTO sa gituohang shabu nga gibana-bana nga mokantidad og P6.5 million nasakmit sa mga sakop sa Abellana Police Station sa Cebu City Police Office atol sa buy bust operation alas 6:30 kagahapon sa buntag.
Ang nasikop giila nga si Reinhard Baring Moreno, alyas “Nard” 29, taga Upper Kawayan, Barangay Sambag 2, siyudad sa Sugbo.
Naglisod ang mga pulis sa pagdakop kaniya kay sa social media niya ipaagi ang pagbaligya.
Matod ni Chief Inspector Ma. Theresa Macatangay, hepe sa Abellana police station, nga niadtong 2016 ug 2017, ila nang nadakpan si Moreno sa paghupot og Nubain apan giingong nakapyansa sa giatubang nga kaso.
Apan na-monitor na usab nila nga nibalik sa iyang naandan nga negosyo nga karon shabu na.
Nakurat nalang sila tungod sa kadaghan sa nakuha nga shabu nga gisulod sa karton sa usa ka ilimnong makahubog.
Sa migawas nga imbestigasyon sa kapulisan, nasutang gikan sa usa ka drug personality sa sulod sa Cebu City Jail ang transaction.
Ang maong tawo mao na usab ang motawag sa iyang source nga maoy mohatag sa drugas niadtong gustong mopalit.
Ang maong personalidad wa lang una nganli samtang adunay plano si Macatangay nga makig-alayon sa kadagkoan sa City Jail labot sa padayon nga negosyo sa suspek sa gawas.
Gipaagi sa social media ang pagpamaligya ni Moreno nga maoy hinungdan nga lisud siya nga dakpon.
“Ang initial namo nga nakuha ang nagplano sa tanan nga duwa gikan sa source padung aning nadakpan naa sa sulod sa city jail. Ang ilang distribution dili lang aning area namo, but sa gawas. Ang bag-o nga paagi nila mo-contact sila thru social networking sites, mo order sila didto,” matod ni Macatangay.
Nasakmit usab sa mga pulis ang P12,000 nga gituohan nga maoy halin ni Moreno sa pagpamaligya sa illegal nga drugas.
Si Moreno nga nahinabi sa mga tigbalita nihimakak nga iyaha ang drugas nga nakuha sa iyang posisyon sanglit igo ra siya nga gisugo.