ALAS 6 sa gabii nga screening time ang akong gilukat nga ticket sa SM Cinema-Consolacion niadtong Huwebes, Agosto 16.
Nagsugod na ang pelikula pagsud nako mga alas 6:10. Apan nakurat ko kay way laing tawo sud sa sinehan.
“Ha? Ako rang usa! Kaguol ba!,” sa akong hunahuna samtang akong gipiratpirat ang akong mata.
Nilingkod ko sa tunga nga pinasay ang duha ka tiil sa atubangan. Akong gipagawas ang akong cell phone kay tutal ako ra bitawng usa. Ako tanan ang sinehan karong gabhiona.
Apan sa tinuod gikulbaan ko gamay kay basin duna n’yay manguhit nakong white lady sa luyo! Simba ko!
Apan ang white lady sa akong hunahuna inanayng gigitik sa mga bulala ug yagayaga sa estorya sa ambisyosang si Annie (Chai Fonacier) nga nagdamgo nga moputi ug motaluytoy ang ilong sama sa iyang gi-fantasyang si Snow White.
Utang
Kada adlaw way laing gilitok si Annie kundi ang makataak sa Hong Kong ug makatrabaho sa Disneyland para kuno sa ekonomiya sama sa iyang mga kaubang dancer nga tua na tanan gawas sa nasud.
Tagawtaw ni Annie nga siya ra ang wa kapasar sa audition tungod sa iyang pagkalagom, pislat pa ang ilong ug way boobs nga maglabyog-labyog sa BoomBoom dance sa Momoland.
Mao ni ang iyang yangongo pirme ni Migs (Edgar Alan Guzman) nga pito na katuig niyang boyfriend nga ambot unsa say nakaon nga patay kaayo niya.
Tungod sa kaluoy ug dakong gugma ni Migs sa dalaga, nidangop sa buayang 5-6 ang ulitawo. Nangutang siya og P180,000 sa gitawag nilang si Tito Val.
Lovely G
Nibudlat ang mga mata ni Annie pagkakita nga duna na silay kuwarta nga ibayad sa iyang pagparetoke.
Ang wala masayri ni Annie nga ang kinabuhi ni Migs ang gisugal sa maong kantidad kon di ni mabayran dayon.
Gikulata si Migs sa karsada. Apan nakit-an ni Tito Val ang nagbansiwag nga seksing billboard ni Lovely G (Miss Philippines-Universe 2016 Maxine Medina). Ug dinhi kalit nisantop sa iyang utok ang laing kabuang.
Gihatagan niya og tulo ka adlaw si Migs aron dad-on ang artistang si Lovely G (Maxine Medina) sa iyang atubangan. Kon iya ning mahimo, impas ang iyang utang.
Ang problema kay way kabangkaagan si Migs sa showbiz ug wa sad siyay kailang artista.
Kon unsaon niya pagpangita si Lovely G maoy laing misadventure ni Migs ug sa iyang mga alegreng barkada nga silang Janus Del Prado, Nico Antonio, Hannah Ledesma ug Mariko Ledesma nga nag-problema sad kon asa mangitag kuwarta aron ibayad ni Migs sa iyang utang.
Happy
Ang “Pinay Beauty” usa ka feel-good comedy movie nga nagbugal-bugal sa kamatuoran ug dunay seryusong mensahe nga siguradong kapanaminan sa kadaghanan.
Bisan guwatsinanggo ang pagka-presentar sa estorya ug may pagka-bulgar ang uban nilang dayalogo, gipamatuod ni Direk Jay Abello nga wala sa kolor sa panit o gitas-on sa ilong o physical nga aspeto ang sukaranan sa kaanyag sa usa ka Pinay, kundi naa sa batasan ug karakter.
Gipakita sad dinhi ang kabililhon nga duna kay higala nga masangpit panahon sa kalisdanan.
Sayang ug tinuod makaguol nga wa kaayo mokita sa Sugbo ang “Pinay Beauty” bisan kon usa ni sa matawag natong “obra maestra” sa walo ka entries nga nagtigi karon sa Pista ng Pelikulang Pilipino.
Ang labing importanteng mensahe sa “Pinay Beauty” nga duna kay respeto ug gugma sa kaugalingon ug labaw sa tanan katagbawan. Sama sa giingon sa pelikula nga dili “I’m happy when I’m beautiful” kundi, “I’m beautiful when I’m happy.”