Diputado: Esplikar lang, ayaw kasuko

HILABIHANG sukoa ni Provincial Administrator Ae Damalerio kang Alan Mangmang tungod sa pagsigi og balik-balik og komentaryo niini sa bag-o pa lang migawas nga COA report nga matod pa migasto ang lalawigan sa Bohol sa kantidad nga P55,320,516.31 para sa usa ka tuig nga “catering services.”

Buot ipasabot, migasto ang Bohol og sobra sa 55 milyon ka pesos alang sa kaon-kaon lang og matod pa sa COA, nakalapas kini sa balaod.

Excessive and extravagant ang maong kagastohan, matod pa sa COA.

Matod sa COA, migasto ang Bohol sa maong kantidad kaniadtong 2017 para sa mga catering services nga ang pagkaon gipakaon lang ni bisan kinsa para sa mga events/gatherings sa maong tuig.

Nakalapas kini sa PD 1445 ug sa section 343 sa RA 7160, matod pa sa COA.

• • •

Tungod sa maong COA report, mipadayag si Alan Mangmang sa iyang obserbasyon kalabot sa maong kagastohan.

Wala mahimuot si Alan Mangmang sa gibuhat sa probinsiya nga pag-gasto sa maong kantidad nga sobra sa 55 milyon pesos alang sa kaon-kaon lang.

Nagpaulan og batikos si Mangmang sa kadagkoan sa probinsiya tungod sa ilang gibuhat. Gani, matod pa niya, dihay magtiayon sa Balilihan, Bohol nga naghikog na lang tungod sa hilabihang kawad-on.

Unya ang mga kadagkoan sa probinsiya, nagpabusdik lang sa ilang kaon-kaon, gamit ang kwarta sa katawhan.

• • •

Unsay gihimo ni Damalerio?

Didto sa sinimana nga programa sa radyo nga binayran sa pondo sa probinsiya, gilampaso ni Damalerio si Alan Mangmang og kining inyong ubos nga igsoon nga nagpataka lang og nagpalabi lang kuno.

Matod pa ni Damalerio, kinsa man diay mopakaon sa PSG, kinsa man diay mopakaon sa mga Ambassador ug uban pa nga mga bisita nga mobisita sa Bohol?

Perteng ka high-blood gyod ni Damalerio samtang nangugat siya nga nagyawyaw sa Kita og ang Gobernador.

Midugang pa si Damalerio nga duna kunoy politiko nga nagpaluyo sa gihimo ni Mangmang ug ang iyang gihimo pamolitika lang kuno.

• • •

Sama sa nakalimot si Ae Damalerio nga mismo ang COA, og dili si Alan Mangmang, ang misulti nga nasobrahan ra ang maong kagastohan.

Sama sa nakalimot si Ae Damalerio nga trabaho niya ang pagpasabot sa COA og ngadto sa mga katawhan kon ngano nga dako kaayo ang kwarta nga gigasto sa lalawigan sa Bohol alang sa pagkaon lang.

Excessive, buot ipasabot nasobrahan ra.

Extravagant, buot ipasabot nga mahal ra og pwede ra unta gastohan pero kanang ubos-ubos pa sa maong kantidad.

Kon mao kini ang nahimong obserbasyon sa COA, buot ipasabot wala mapasabot og maayo sa kagamhanan sa Bohol kon nganong miabot og ingon ana kadako ang kagastohan sa pagkaon.

Og tungod niini, sayop ang gihimo ni Ae Damalerio nga mobatikos hinuon sa mga mo-komentaryo sa obserbasyon sa COA bahin sa maong kagastohan.

Trabaho niya ang pag-isplikar og dili apil sa iyang trabaho ang pag-atake ug pagbatikos sa mokomentaryo sa maong kalihokan.

• • •

Gani, isip usa ka ordinaryong empleyado sa kagamhanan sa Bohol, duna siyay obligasyon nga moalagad og mo-serbisyo sa katawhan.

Wala maapil sa maong obligasyon ang pag-atake ug pagpakaulaw sa mga tawo ug mga magbubuhis.

Og kon mo-atake og magpakaulaw man gani si Damalerio sa ubang mga tawo, nindot unta kon iya kining himuon sa usa ka programa nga siya mismo ang nagbayad ug dili sa usa ka programa nga ang probinsiya sa Bohol ang nagbayad.

Abuso sa gahom ug katungdanan ang iyang gihimo.

Lahi ang sitwasyon ni Alan Mangmang tungod kay block time ang iyang programa og si Atty. Victor de la Serna ang nagbayad sa maong programa.

Tungod niini, nakapangutana ako.

Kon gihimo kini ni Ae Damalerio nga usa lang siya ka provincial administrator, unsa na kaha ang iyang buhaton kon hatagan pa siya og taas-taas nga katungdanan sa gobiyerno?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph