BISAN ang mga opisyal sa awtoridad nasurprisa sa ulahing drug bust sa Sambag 2, dakbayan sa Sugbo nga nisakmit og dili mominos P6.5 milyunes nga shabu gikan sa dakong drug pusher sa dapit niadtong Lunes sa buntag.
Ang dakong kantidad sa shabu nasakmit taliwala sa mas gihigpitan nga kampanya sa gidiling drugas ni Presidente Rodrigo Duterte, hinungdan sa pagduda sa pipila ka opisyal kon duna kahay laboratoryo o dakong bodega sa gidiling druga sa Sugbo?
Mao kini ang gipadayag ni Cebu City Police Office (CCPO) Director Senior Supt. Royina Garma human sa pagkasikop mi Reinhard Baring Moreno, alyas “Nard” 29, taga Upper Kawayan, Barangay Sambag 2, siyudad sa Sugbo niadtong Lunes.
Naglisod ang mga pulis sa pagdakop kaniya kay sa social media niya ipaagi ang pagbaligya ug matod ni Chief Insp. Ma. Theresa Macatangay, hepe sa Abellana police station, nga si Moreno nadakpan na 2016 ug 2017 nga naghupot og nubain ampules apan, giingong nakapyansa sa giatubang nga kaso.
“It’s just abundant, madami eh. You can just order now balikan mo. And then ang ganda ng quality crystal pa gud ha, buo-buo pa gud. Di gud siya na powder na nakit-an nimo nga talagang nadurog,” dugang ni Garma, tungod niini, posible nga gikan kini sa laboratory o bodega sa Sugbo.
Apan asa kini nahimotang? Kini ang dakong mga tigpaniid sa awtoridad nga nigawas nga pulpol o huyang tungod sa padayong nanglusot ug kaabunda gihapon sa gidiling drugas sa Sugbo. Dili kaha nagkuwang ang tabang gikan sa publiko?
Importante ang bahin sa katawhan sa kampanya batok sa druga. Sila ang nasayod sa ilang palibot. Mas paborable sa pagpaniid. Sekretong itaho sa awtoridad sa maamatikdan nga dautang lihok sa pipila tawo o grupo. Seguridad nato kining tanan.