GIBUTYAG sa Commission on Audit (COA) nga nag-hire og job order (JO) nga mga empleyado ang kagamhanan sa dakbayan sa Toledo nga wa moagi og mga kontrata kondi appointment orders lang ug manpower requests gikan sa lainlaing mga departamento.
Sa 2017 annual audit report, matod sa mga state auditor, base sa records sa accounting, niabot og P113,265,231.40 ang kinatibuk-ang nabayad nga sweldo sa Toledo City Government sa 2,414 ka JO nga mga trabahante sa Toledo City Hall sa 2017 ug kini gi-charge sa Maintenance and Other Operating Expenses (MOOE).
Sa 2,414,928 niini naa nadestino sa Clean and Green Program sa siyudad diin matag usa gisweldohan og P350 matag adlaw.
Sa maong programa lang, nikabat na og P20,677,750 ang kinatibuk-ang nabayad nga sweldo sa dakbayan alang sa mga JO nga trabahante hangtod sa Disyembre 2017.
Sa evaluation, review sa mga payroll ug sa mga interview nga gipahigayon, nakaplagan sa mga state auditor nga ang mga JO employee nga naa sa field kay wa paggamit og bundy clocks o biometric machines aron pag-record sa ilang attendance sa pag-duty matag adlaw.
Nabantayan usab sa COA nga ang gipasukip nga Daily Time Records (DTRs) sa mga payroll kay manual nga gihimo ug kasagaran managsama ra ang mga oras sa pagsud ug paggawas sa trabaho.
Ila usab nakit-an nga di updated ang logbooks sa pipila ka mga buhatan hinungdan ang ubang entries sa DTR kay dili ma-validate.
Sumala sa mga state auditor sa 2,414 ka mga kawani nga ubos sa job order sa 2017, 1,131 niini ang dunay service periods nga nilapas.
Nakit-an usab sa mga state auditor nga ang uban sa mga JO employee kay gipahimo og technical nga mga trabaho sama sa inspection sa business accomplishments alang sa insaktong buluhisan, assessments, review sa mga dokumento, mga koleksyon ug ubang mga gimbuhaton nga angay unta ipabuhat ngadto sa regular ug career nga mga kawani sa civil service.
Nabantayan usab sa COA nga duna nay mga duplication sa mga assignment sa trabaho kay daghang mga JO employee ang managsama ra ang mga gipangtrabaho.
Hangtod sa Disyembre 2017, 556 ang nabutangan nga plantilla nga mga position sa kagamhanan sa Toledo samtang may 83 pa nga mga bakante.
Sigon ni Toledo City Mayor John Henry “Sonny” Osmeña nga ila nang gihimoan og aksyon ang mga nabantayan sa COA sa ilang pag-hire og mga trabahante nga mga JO.
“We’re addressing that problem. In fact right now, that is already being done,” sumala sa mayor dihang nahinabi sa Superbalita Cebu.
Siya nipasabot ang JO employees gipakatap sa 38 ka mga barangay ug lainlaing mga departamento sa siyudad.
Sumala sa COA ang wa pagsud og mga kontrata sa siyudad tali sa JO nga mga kawani niresulta sa kapakyas sa pag-justify sa ahensiya sa panginahanglanon sa pagkuha sa ilang mga serbisyo.
Gidugang sa ahensiya nga di usab ma-review ug ma-monitor ang accomplishments niini kay way makita nga output sa ilang mga trabaho.
Ang audit observation sa COA gipaabot ngadto sa kagamhanan sa Toledo pinaagi sa Administrative Order Memorandum 2018-014 nga pinetsahan og Pebrero 9, 2018.
Apil sa girekomendar sa COA sa mga opisyal sa Toledo City Government ang pagduso og certified nga kopya sa job order contracts o service contracts sa Human Resource Management Office, paggamit og punch cards o biometrics ug pag-limit sa pag-hire og j.o. nga mga trabahante sa aktwal nga panginahanglanon alang sa normal nga operasyon sa siyudad. SCG