MGA traffic enforcer sa siyudad sa Talisay ug Naga giawhag sa Kapitolyo nga motabang sa lungsod sa Minglanilla pag-atiman sa dagan sa trapiko atol sa kasaulogan sa kapistahan karong adlawa.
Hinuon, matod sa focal person on traffic management sa Kapitolyo, Joy Tumulak, gipaniguro na sa traffic management group sa Minglanilla nga maato ra nila ang pagdumala sa mga sakyanan nga mangagi sa highway.
Gipaabot hinuon nga mohuot ang dagan sa trapiko tungod sa mga tawo nga maglakaw kilid sa dalan o manglabang sa mga intersection, ilabi na kay duna may mga kalihukan pahinungod sa pista.
Bisan sa kalihukan, gitug-an ni Tumulak nga ipatuman ang normal nga operasyon sa mga traffic light sa lungsod.
Gawas sa mga traffic enforcer, motabang sab sa pagpatunhay sa dagan sa trapiko ang mga sakop sa Municipal Disaster Risk Reduction and Management Office sa Minglanilla. AZLG