WAY nakuhang iligal nga drugas ug paraphernalia ang mga sakop sa Bureau of Jail Management and Penology (BJMP) sa surpresa nilang gipaubos sa greyhound operation ang Mandaue City Jail kagahapon sa buntag.
Matod ni Assistant Jail Warden Inspector Johan Alatraka nga bugtong sharp objects lang sama sa lansang, ballpen ug improvised metal objects ang nakuha sa operatiba atol sa operasyon nga nagsugod pasado alas 5 sa buntag.
Kini na ang ikaduhang greyhound operation sud sa city jail karong buwana.
Dugang ni Alatraka nga halos sa 100 ka kawani ang ningsalmot sa operasyon lakip na ang ka mga bag-ong recruit sa BJMP.
Atol sa sa operasyon, gipagawas sa operatiba ang 300 ka mga piniriso sud sa ilang mga selda.
Lima ka mga selda ang gisusi sa mga operatiba sa annex building sa maong pasilidad.
Sa miaging buwan, dul-an sa 10 ka mga BJMP personnel nga gidudahan nga nakigkunsabo sa mga piniriso nga nagpalusot og kontrabando gipangrelibuhan.
Gipangbalhin sila sa laing mga pasilidad ubos gihapon sa mao nga buhatan.
Usa kanila ang napalgang positibo sa drug test.
Ang mao nga personnel boluntaryong ni-resign.
Ang lakang sa BJMP gihimo human mapatay sulod sa pasilidad si Steve Go, gitumbok sa mga awtoridad nga drug lord. JPP