NAGTUO ang hepe sa Cebu City Police Office nga adunay shabu laboratory o shabu warehouse sa Sugbo kay daghan gihapon ang nakuha nga drugas sa ilang nagpadayon nga anti drug operations.
Matod ni CCPO Director Senior Superintendent Royina Garma nga sa nasakmit nga mga binulto sa gituohang shabu, maila nga high grade nga klase tungod kay crystal clear.
Kini nagpasabot nga naa ra sa duol gihimo ang shabu, nga mahimong naa ra sa palibot sa syudad ug lalawigan sa Sugbo.
Gipalapdan karon sa iyang mga sakop ang intelligence monitoring.
“I strongly believe na may bodega dito eh. Yeah, I strongly believe na mayron kaya. Yan ang tinututokan ngayon and di namin mahanap pa,” matod ni Garma.
Di kasarangan ang volume sa drugas nga ilang nakuha sa nanglabay nga mga adlaw.
Makakuha dayon silag supply sud sa pipila lang ka oras, nagpasabot nga naa ra sa duol ang supplier.
Sa milabay nga mga semana, ang kapulisan sa syudad ug mga silingang probinsya sa Sugbo nakasakmit og minilyon ka pesos nga balor sa drugas.
Sa Negros Oriental, ang Dumaguete PNP nakasakmit og kapin sa usa ka kilong shabu nga mobalor og P23 million samtang sa miaging buntag, nakakuha usab ang Abellana police station og P6.5 million nga shabu sa ilang buy bust operation.
Gitug-an ni Reinhard Moreno nga wa siya makaila sa naghatag sa binultong shabu sanglit gisugo lang siya sa usa ka drug personality nga naa sa sulod sa Cebu City Jail.
Tungod niini, nakig-alayon na sila sa City Jail ug giingong nasayod na ang mga opisyal sa bilanggoan.
Giingong gi-isolate na kini sa usa ka selda nga siya rang usa ang gibutang. Wa lang una kini nganli ni Garma kinsa sanglit nagpahigayon pa sila sa ilang imbestigasyon.
Gusto nila nga masayran asa magkuhaan sa iyang supply sa drugas ang middle man nga naa sa bilanggoan aron maoy target sa sunod nila nga anti drug operation.
Nidangop na usab sila sa PNP Cyber-Crime Group 7 aron masubay pinaagi sa social media ang mga contact ni Moreno nga iyang gibaligyaan sa illegal nga drugas.