NIHANGYO ang Sangguniang Panlalawigan sa Sugbo sa Land Transportation Office sa Central Visayas nga molusad og operasyon batok sa mga trak ug ubang klase sa mga sakyanan nga illegal nga moparada daplin sa nasudnong highway sa lalawigan.
Si Atty. Vicente Gador Jr., acting assistant regional director ug operations chief sa LTO 7, niingon nga manginahanglan sila sa partisipasyon sa Department of Public Works and Highways (DPWH) ug ayuda sa Philippine National Police sa paghimo sa operasyon.
Matod ni LTO 7 Director Victor Emmanuel Caindec nga angayan ang mga local government unit ang mangu sa pagpatuman sa mga lagda sa trapiko ug transportasyon sa ilang tagsatagsa ka lugar.
Gibutyag ni Gador nga ilang planohan ang pagpatuman sa hangyo sa provincial board ug sa mosunod nga mga adlaw molusad sila og operasyon. Siya nipasabot manginahanglan sila sa ayuda sa DPWH kay dunay mga balaod nga nag-ila sa mga butang o estruktura nga kinahanglan ipatangtang o ipahawan kay nagbabag sa national highway.
Ang pagbabag sa nasudnong highway usa ka kalapasan sa Section 23 sa Presidential Decree (PD) 17 kun Revised Philippine Highway Act ug PD 1096 kun National Building Code of the Philippines.
Nihangyo ang PB sa LTO 7, pinaagi sa gipasar nga resolution nga gipangamahan nila ni Bokal Raul Bacaltos ug Bokal Edsel Galeos, nga mopahigayon og operasyon batok sa mga trak ug ubang sakyanan nga nag-park daplin sa national highway human sa disgrasya niadtong Agusto 11 sa kaadlawon sa Barangay Poblacion 2, siyudad sa Carcar.
Sigon ni Jonathan Tumulak, focal person on traffic management sa lalawigan, nga nakadawat na sila og mga reklamo nga ang gipalapdan nga mga dan sa habagatan labi na gikan sa dakbayan sa Naga hangtod sa Carcar, gihimong parking area sa dagkong mga trak ug ubang mga sakyanan panahon sa kagabhion.
Ubos usab sa Section 46 sa RA 4136 kun Land Transportation and Traffic Code, gidid-an ang mga drayber og mga sakyanan nga mag-park sa highway o roadway side, sud sa intersection, crosswalk ug ubang mga dapit nga giila sa balaod.
Matod ni Caindec ang kakuwang sa disiplina ug pagsunod sa mga lagda sa trapiko sa mga drayber ang problema hinungdan nga dili masolusyonan ang suliran sa trapiko. SCG