SI Presidente Rodrigo Duterte nibutyag nga dunay mga pulis ug personnel sa Philippine Drug Enforcement Agency (PDEA) sa Cebu nga mga adik.
“Sa Cebu mga pulis adik. Kasagaran pulis adik. PDEA adik,” matod sa Presidente sa iyang pagpamulong atubangan sa gatusan ka mga mayor kagabii dinhi sa Cebu City.
Iya usab nga gibutyag nga duna nay adunahang mga tawo sa Sugbo nga naggamit og cocaine.
Nipahimangno si Duterte nga gipaspasan sa pagpasulod dinhi sa nasod ang cocaine sa mga drug cartel nga naghimo niini nga “worldwide crime.”
Hinuon, naneguro siyang way shabu laboratory sa nasod bisan kon si Cebu City Police Director Royina Garma nagduda nga naa kini dinhi. (Estorya sa pahina 3).
Matod ni Duterte nga pipila ka adunahang mga Sugboanon naggamit og cocaine kay sila “ni-graduate” na sa shabu.
“Cocaine is making its headway. They’re trying to make it a worldwide crime organization,” nagkanayon si Duterte.
“Dito sa Cebu, yung mga mayayaman dito, cocaine na iyan sila. They have graduated (from taking other illegal substances). But most of them may tama na,” siya nidugang.
Si Duterte namahayag niini samtang iyang gituki ang mga epekto sa shabu nga iyang gihulagway nga labing makadaut nga butang nga momugna og hallucination ug depression sa drug users.
Siya nipahimangno sa mga sindikato sa drugas nga kuyaw kaayo alang kanila kon magpadayon sila sa ilang ilegal nga negusyo sa nasod.
Iyang gibalik ang iyang hulga nga di siya magpanuko sa pagpatay ni bisan kinsang tawo nga nalambigit sa ilegal nga drugas.
“Shabu is characterized as the most toxic and lethal simply because shabu comes from a mixture of chemical. Unlike cocaine, cannabis or heroine, they are extracts from the poppy [which is] organic,” siya niingon.
“Now, there is no more laboratory, if at all, dito sa Pilipinas. They are avoiding it because it’s very dangerous. Kasi alam nila kapag natsambahan ko sila, alam nila patay talaga sila. Wala akong drama-drama diyan sa human rights. P***** i**, yayariin talaga kita,” dugang niya.
Wa ma-comatose
Nipahuway ra.
Mao kini ang gibutyag ni Duterte atol sa pagbisita niini sa Sugbo kagahapon sa conference sa League of Municipalities of the Philippines (LMP) Visayas Island Cluster sa Radisson Blu.
Gitubag sa presidente ang pasangil kaniya ni communist leader Jose Maria Sison nga siya na-coma. Si Duterte kinsa gikan sa dakbayan sa Davao, niabot sa maong kalihokan hapit na alas 7:00 sa gabii.
Matod ni Duterte nga di siya makabalibad kang LMP President Ma. Fe Brondial, kinsa mayor karon sa Socorro City sa Oriental Mindoro, tungod kay usa si Brondial sa mga mayor nga nisuporta kaniya atol sa iyang pagdagan pagka presidente. Sunnex, HBL