KUNG kan-unon nga bibingka ang hisgotan, wala nay mas lami pa sa nilutong “bibingka” ni Nanay Rosela Jagonal.
Makit-an ang iyang lutuanan daplin sa dalan sa lungsod sa Manticao Misamis Oriental diin sa iyang 80 anyos kapin nga pangidaron lig-on pa gihapon kaayo og bukton nga mosalang og mano-mano sa iyang hinimong bibingka.
Atol sa familiarization tour nga giorganisa Provincial Tourism Department ubos ni Atty. Jeffrey Saclot alang sa mga sakop sa prensa.
Lakip sa itenirary ang hunungan ug matilawan ang bibingka ni Nanay Rosela ug matud niini sa SunStar SuperBalita nga 21 anyos pa siya nagsugod og himo og bibingka ug mao na gyod ang iyang nahimong panginabuhian sulod sa pipila ka katuigan hangtod sa kasamtangan.
Butyag niini nga dili sayon ang iyang mga kasinatian, daghan na usab siya gipang-apilan ug gipangtambongan nga mga pa contest ug uban pa tungod sa iyang kaantigo sa paghimo og bibingka ug gani narekognisar kini sa lokal nga kagamhanan tungod sa lami nga delikasiya niini.
Tungod sab labihan ka halinon ang iyang bibingka, aduna na siyay katabang niini nga iya ra usab lima ka sakop sa pamilya labina nga dili naman kaayo niini makaya moarsa ug bug-at.
Apan nagpabiling sekreto alang kang Nanay Rosela ang ingredients niini nga maoy rason gabalik-balikan sa mga nakatilaw niini.
Tinoud gyod ang panultihon nga “once tasted always wanted” kay haom kaayo sa niluto ni Nanay Rosela nga bibingka kay bisan ako mismo gusto napod motilaw utro.