GIPANINGKAMOTAN karon sa kagamhanan ni Misamis Oriental Governor Yevgeny Vicente Emano nga mahimong chocolate capital sa Northern Mindanao ang probinsya sa Misamis Oriental.
Matud ni Assistant Provincial Agriculture Officer Linda Tecson nga ang cacao production gipaningkamotan sa ilang buhatan nga mapalambo tungod kay usa kini sa flagship program sa gobernador.
Sa Misamis Oriental aduna 20 ka ektarya sa 3,000 ka ektarya sa kakao ang gaprodyus pa karong panahona. Dinhi sa Misamis Oriental adunay naprodyus nga 8 metric tonelada matag tuig.
Malaumon kini nga ang kadtong first batch sa mga cacao growers magharvest na karong katapusan nga bulan sa tuig 2018.
Padayon ang inspeksyon sa ilang buhatan sa mga plantasyon sa cacao nga anaa nahimutang sa Claveria, Villanueva ug lungsod sa Jasaan.
Gawas niini lakip sa giinspeksyon ang mga cacao farms sa lungsod sa Tagoloan.
Dinhi sa Northern Mindanao, gibutyag ni Tecson nga ang probinsya sa Camiguin aduna nay chocolate processing center nga gisuportahan og langyaw. Mahimo na usab kining suroyan sa dapit.
“Kung mosulod daw ka didto sa ilang chocolate processing center mawala imong stress," matud niini atol sa press briefing nga gitambongan sa SunStar SuperBalita.