MIKAMPEYON ang Department of Education (DepEd) Iligan City sa Higalaay Choral Competition niadtong Agusto 21, 2018 nga gipahigayon sa Activity Center, Centrio Ayala Mall, dakbayan sa Cagayan de Oro.
Ang DepEd-Iligan Chorale sa Division of Iligan City nakadawat og P75 mil nga ganti, gisundan sa Division of Cagayan de Oro o CDO Golden Crescendo nga nakadawat og P60 mil ug ikatulo ang Division of Lanao del Norte o D’Voice of Lanao diin nakadawat usab og P50 mil lakip ang trophy.
Aduna’y madawatan usab nga P10 mil nga consolation prize ang mga matag partisipante.
Sa pakighinabi kang Nimfa Lago, Ph.D, Assistant school division superintendent sa Iligan City, gibutyag niini nga malipayon sila ug wala magdahom nga mamahimong mananaog ilabi na nga mao kini ang labing unang higayon nga nag-organisa sila og chorale group.
“We did not expect because this is our first time to organize the chorale group, we are so very happy, but we really believe our participants and of course the conductor,” pahayag ni Lago.
Mapasigarbuhon usab ang division sa dakbayan pinaagi kang Cagayan de Oro Schools Division Superintendent Jonathan de la Peña gumikan sa nasakmit nga kadaugan.
“I’m so proud, one of the three best chorale in Northern Mindanao, so lipay kaayo isip ilang Schools Division Superintendent," pahayag ni de la Peña.
Gibutyag usab ni Eileen San Juan, chair sa Higalaay Festival, nga si Mayor Oscar Moreno ang nagpasiugda sa choral competition ug kini na ang ikaduhang tuig diin gisugdan kini pinaagi sa pagkanta sa “Sakayanon” nga tipik sa gi-compose sa mismong inahan nga si Milagros Serina-Moreno.
Si DepEd Secretary Prof. Leonor Briones, kinsa mahilig usab sa musika, ang mitambong kauban ang Manila concert choir.
Tumong niini nga pinaagi sa musika magkahi-usa ang katorse ka mga division sa probinsiya ug siyudad sa Northern Mindanao hinungdan nga gipahigayon kini sa Regional office sa DepEd uban sa tabang sa siyudad.
Dunay siyam ka probinsiya ug lima mga siyudad sama sa Bukidnon,Cagayan de Oro, Camiguin, El Salvador, Iligan, Gingoog, Malaybalay, Ozamis, Oroquita, Tangub, Valencia, Lanao del Norte, Misamis Occidental, Misamis Oriental ang niapil sa maong kompetisyon.