WALA pa matino kong unsa ang hinungdan sa kamatayon sa lima ka mga kanding nga nakunis-kunis ang mga lawas niadtong Lunes sa hapon, Agusto 20, 2018 sa Barangay Baikingon, dakbayan sa Cagayan de Oro.
Maayong pagka-abhak sa lawas sa mga kanding ug nangabali-bali pa ang mga tiil niini gani ang usa kanding ulo na lang ang nabilin.
Nasayran nga mga alas 3:30 sa hapon, nadiksobre sa tag-iya sa mga kanding nga si Vic Agbaluta ang insidente nga nangamatay na ang iyang binuhi.
Namatikdan usab ang mga samad sa sungay sa duha ka mga inayan nga kanding nga posibleng nisukol pa kini pinaagi sa pagsungag. Ang uban nga mga kanding nakita na lang duol sa suba nga bahin hinungdan nga dako ang pagtuo nga buaya ang naghimo niini.
Dunay mga nagtuo nga buaya ang responsabli samtang ang ubang mga residente nagtuo nga sigbin, halas, ungo, dakong iro ug uban pa.
Gikatakdang susihon sa City Veterinary Office ang maong hitabo aron pagsuta kong unsa nga mananap usab ang naghimo niini.
Giluto na usab sa mga residente ang nahibilin nga parte sa mga kanding.
Nasayran nga niadtong milabay nga mga adlaw, patay usab ang 21 ka mga manok human usab nga gilapa sa wala pa masuta nga mananap sa Barangay Kauswagan.