“Ang resulta nakuryentihan sila kay si Digong lig-on pa.”
MIKUYANAP ang balita nga na-comatose si Presidente Rodrigo Duterte ug ang tinubdan nanukad kang Communist Party of the Philippines founding chairman Jose Maria Sison.
Gisegundahan sab ni Magdalo Partylist Representative Gary Alejano nga dapat ipahibalo sa katawhan ang tinuod nga kahimtang sa Presidente kay nakaapil kini sa Constitution sa nasud.
Normal sa usa ka tawo nga mobati'g kakapoy sa iyang pagtrabaho ug gikinahanglan sa tawo nga mopahulay. Dili ikalimod nga edaran na sab ang pangulo ug daghan na ang gibati sa iyang lawas kon itandi sa mga tuig sa dihang usa pa siya ka batan-on.
Sa maong isyu, iyang gibalikan si Sison ug giingnan nga ikaw ang may sakit apan giubanan sa iyang panghinaut nga mabuhi pa si Sison ug lugwayan sa dugang 1,000 pa ka mga tuig.
Usa sa mga isyu nga kanunay ginabungat sa mga kritiko ni Duterte ang iyang kahimsog ug ginahimong sukaran sa isyu nga dili na siya takus nga magpadagan sa gobyerno, dili sab kuno tarong ang iyang pagdumala kay patay ra ang pirming gihunahuna nga sulbad sa mga problema sama sa mga nalambigit sa illegal drugs ug sa kurapsiyon sa kagamhanan.
Nahinumdom ko nga niadtong panahon sa kampanya naningkamot pagtuboy si Sison kang Duterte gani man giatangan sa iyang mga suporter ang iyang mensahe gikan sa nasud sa The Neitherland.
Tungod kay dili man magunitan ni Sison si Pangulong Digong ug dili matuman ang ilang gusto nga mahitabo, nahimo silang kabahin sa hut-ong sa mga nagapanghimaraut kang Pangulong Duterte karong panahona.
Gipakita ni Pangulong Digong nga piskay pa ang iyang panglawas ug naa sa husto nga panghunahuna ug kasaligan pa ang iyang desisyon sa iyang pagtimon asa padulong ang atong nasud uban sa katawhan.
Sa atong yanong pagsabot, wa mabalaka ang mga kritiko nga mawala sa pagdumala ang presidente apan uban sa pagmaya ang ilang pagpasiatab nga mahuman na ang gahum ni Digong. Ang resulta nakuryentihan sila kay si Digong lig-on pa.
Sa kahimtang sa political career sa mga kritiko ni Digong sa natad sa politika, hilabihan ang ilang paglukapa kay naugkat ang mga anomaliya diin dili milyon apan bilyones ang kuwarta sa gobyerno nga nahanaw ug wa mapanghimuslan sa katawhan kay pipila lang ang nakatagamtam.
Sa tigum sa mga sakop sa Libetal Party atol sa pagsaulog sa pagkamatay ni kanhi Senador Benigno Aquino Jr. namahayag si kanhi Presidente Noynoy nga iyang pangunahan ang pagpangampanya sa mga kandidato sa ilang partido sa umaabot nga eleksiyon alang kuno sa lig-on nga oposisyon.
Ikaw sa imong kabahin motuo pa ba ka?