NAPUNO sa daghang batikos agi sa social media ang paghatag og higayon kang kanhi Autonomous Region in Muslim Mindanao (Armm) Governor Zaldy Ampatuan nga makagawas sa prisohan og tulo ka oras aron lang makatambong og kasal sa iyang anak sa usa ka hotel sa Pasay City.
Gipagawas si Ampatuan sa prisohan alas 4 sa hapon hangtud alas 7 sa gabii niadtong Martes nga giubanan og daghang mga escorts nga pulis.
Gipangatarungan sa Bureau of Management and Penology (BJMP) nga base kini sa court order human mipetisyon ang kampo sa Ampatuan.
Angay man lang gyud tuod nga batikuson kini gumikan kay prebilihiyo kini nga wala ihatag sa ubang mga piniriso sa nasud. Pinili lang ang gihatagan niini nga prebilihiyo ug kasagaran mga inila ug datu nga mga personalidad ug pipila mga opisyal sa gobyerno.
Si Ampatuan nag-atubang og 58 ka ihap sa kasong murder nga dunay kalambigitan sa 2009 Maguindanao massacre. Kapin 30 sa napatay mga media practitioners.
Apan bisan gani kadtong priso nga usa lang ka kaso ang giatubang, nganong di man matagaan sa samang prebilihiyo aron nga makabisita sa iyang pamilya? Ingon na ba gyud niini ang justice system sa nasud?
Di man lang si Ampatuan ang gihatagan sa maong prebilihiyo, kon di, bisan ang mga senador nga nangapriso sama nila ni Bong Revilla ug kanhi Jinggoy Estrada. Mas labaw na si kanhi senador Juan Ponce Enrile, gawasnon na gumikan kay may balatian kuno sa lawas.
Apan kon atong lilion ang mga prisohan sa nasud, daghan kaayong mga priso ang nagmasakiton na apan naa pa gihapon karon nagtingkagol.
Tungod ba kay wala silay kuwarta ug way maayong abogado nga makuha aron ipanalipod sila?
Kaluoy intawon sa mga pobreng priso kay seguradong mamatay na lang sa prisohan kay way kuwartang ikuha og maayo ug brayt nga abogado aron idepensa sila sa kasong giatubang?