DUHA ang patay samtang tulo ang nangaangol sa lima ka mga tawo nga nakuryentihan sa managlahing mga dapit sa Sugbo niadtong Martes.
Ang usa sa duha ka mga hitabo nahimong trahedya sa usa ka pamilya sa lungsod sa Alcantara kay upat ka sakop niini nakuryentihan, diin duha ka magsuon ang dungan nga nangamatay.
Ang upat nakuryentihan niadtong Martes sa alas 3:00 sa hapon sa Brgy.Palanas sa mao nga lungsod.
Namatay sa pag-abot sa tambalanan sila Junie, 18, ulitawo, ug Philip Tabanao, 17, samtang naangol ilang maguwang nga si Gina ug anak niini nga si Louege Tabanao, 3.
Aksidenti nga nakatunob sa barbed wire nga guba nga gikoral sa yuta ug gikutay sa lubi.
Nasaghid sa palwa ang linya sa kuryente hinungdan nga mi-ground kini sa punoan nga gihiktan sa barb wire nga na-grounded usab sa linya sa Cebu Electric Cooperative (Cebeco) 1.
Si SPO3 Christopher Bani nagkanayon nga si Gina nga nakakita sa iyang anak na nikalit lang og kirig dihang nakahikap sa wire nitabang ug nigakos sa bata, apan siya usab nikirig.
Ang iyang igsuon nga si Junie nga nakakita sa iyang igsuon ug pag umangkon nga nikirig, dali nga nitabang, gibira ang ilang mga kamot ug tiil, pero siya sab hinuon nikirig.
Si Philip nga nakakita sa iyang duha ka igsuon ug pag-umangkon, nagdali sa pagtabang, apan lakip usab siya nakuryentihan.
Ilang silingan nga ginganlag Ricky wa maratol, maoy nitabang sa mga biktima.
Si Ricky daling nibira sa buhok ni Gina hinungdan sa pagkalagpot niini uban sa iyang 3 anyos nga anak. Ang mga biktima gidali sa mga silingan sa pagdala sa tambalanan, sila si Junie ug Philip nangamatay.
Si Bani niingon nga sa ilang pag-imbestigar, dunay linya sa Cebeco sa lugar hinungdan nga nakuryentihan ang mga biktima.
“Nakita nato didto ang palwa sa lubi, inig hangin masaghid sa linya sa kuryenti mao nga mi-ground sa punoan diin didto sab ang guba nga barbed wire,” dugang ni Bani.
Ang mga representante sa Cebeco 1 niadto sab sa maong dapit diin nakita nila ang palwa sa lubi nga nasaghid.
Matod ni Bani nga ang mga representante sa Cebeco-1 nakig-estorya na sa mga kabanay sa mga biktima.
Nipadayag kini nga andam silang moabag sa pagpahiluna sa mga namatay ug sa pagpatambal sa bata ug inahan.
Gipadayag ni Bani nga 10 ang magsuong mga Tabanao, wa nay amahan kay namatay samtang ilang inahan way trabaho.
Sa laing bahin, na-angol ang usa ka ulitaw human nakahikap og barb wire sa usa ka bulding sa Barangay Consojong, dakbayan sa Talisay sa alas 3:00 sa hapon.
Giila ang biktima nga si Jonard Palo, 18, kinsa lumad taga Barangay Kalunasan, dakbayan sa Sugbo.
Si PO1 Carbon Tuilo nagkanayon nga si Jonard nikuyog sa iyang uyoan nga giingong welder sa usa ka building sa Barangay Consojong. Si Jonard nagsuroy-suroy sa building dihang nakahikap sa grounded barb wire ug nakuryentihan. Maria Jenesis G. Empasis - CIT-U Intern