BUG-AT alang sa mga residente ning siyudad sa Cagayan de Oro ang giduso nga P10 nga plitehan sa mga dyip pasaheroan.
Dunay mga nagkalain-laing reaksyon nga nakuha ang SunStar Superbalita sa gihimo nga pulso ngadto sa katawhan.
Si Ariel Ylana, taga Macanhan, Carmen ning siyudad niingon nga dili siya uyon niini tungod kay two rides siya matag adlaw sa iyang trabahoan.
“Pait kaayo kay motaas ang plete pero atong sweldo walay pagsaka,” Matud niini sa SuperBalita.
Samtang si Jessa Lumadag sa iyang bahin nga taga Nazareth ning siyudad niingon nga dili siya uyon tungod kay mahal na kaayo kini.
“Sakit sab nga ang atong iplite nga diyes wala nay ibalik nga tres,” pahayag niini.
Niadto lamang adlawng Lunes ang transport group sa Northern Mindanao nipasabot nga dili makataronganon sa mga sumasakay ang maong sugyot.
Matud ni Ringo Lago kinsa Secretary General sa Solidarity of Transport Alliance sa Northern Mindanao (Starex-Piston) nga kung ang bag-ong increase maaprobahan luoy ang mga sumasakay labina na nga walay pagsaka sa suholan sukwahi sa kalipay sa mga driver human madugangan ilang income.
Dako ang ilang pagtuo nga epekto kini sa Tax Reform for Acceleration and Inclusion (Train) law.
Ang Land Transportation Franchising and Regulatory Board (LTFRB)-Northern Mindanao nag-endorso sa central office kalabot sa petition sa transport group nga usbawan ang pasahe sa dyip ngadto sa P10 ug dugang P1.50 sa dugang dagan nga kilometro human sa konsultasyon nga nahitabo niadtong niaging semana.