PARAISO nga gipalibotan og lainlaing klase sa mga buwak.
Kini ang mahulagway sa bag-ong atraksyon karon sa lungsod sa Dalaguete nga gidagsa na usab sa mga turista sama sa ubang suroyanan.
Ang Flower Garden sa Mt. Talongon sa Sitio Alang-Alang, Barangay Mantalongon giablihan ngadto sa publiko niadtong Marso 24, 2018.
Sa kantidad nga P50, regular nga entrance fee, makita nimo ang nagkadaiyang klase sa mga buwak gikan sa imported hangtod sa native.
Kon nagpuyo sa Barangay Mantalongon, Dalaguete, P30 lang ang entrance fee, P30 kon senior citizen ug way bayad kon 12 anyos ug paubos.
Matod ni Gregorio “Roger” Amamag-id, farm manager sa Flower Garden, sa dos ektarya nga gidak-on sa luna, kapin sa usa ka ektarya ang gipalambo, gi-landscape ug gitamnan og mga buwak sugod niadtong Mayo sa miaging tuig.
Kini ang usa sa mga proyekto nga gipasiugdahan ni Dalaguete Mayor Ronald Allan Cesante.
Sumala ni Amamag-id ang lote kanhi gipanag-iya sa usa ka pribadong indibidwal ug gipalit sa lungsod aron himuon isip usa ka destinasyon sa ecotourism.
Karon usa na kini sa sikat ug paborito nga mga suroyanan sa mga turista sa lungsod labi na ang mahilig mag-selfie kuyog ang mga buwak.
Ang dakong bahin sa yuta kay gipatuboan og 3,000 ka mga punoan sa sunflower, diin ang uban niini kay mga hybrid ug giangkat pa gikan sa Taiwan.
Matag tulo ka buwan mangamatay ang mga sunflower ug mamuwak na usab og balik.
Sa sinugdanan moabot sa kapin 30 ka mga klase sa mga buwak ang makita sa garden.
Apan ang uban niini nangalawos ug nangamatay kay wa makaagwanta sa kainit hinungdan nga kapin sa 20 na lang ang nagpabilin, dugang ni Amamag-id.
Apil sa makita sa garden ang rose snapdragon, white snapdragon, pink snapdragon, puti ug yellow nga chrysanthemum, aster violet, puti ug blue nga salvia, fittonia midnight, fittonia pink bean, ug fittonia dream rose.
Nitubo usab sa maong dapit ang mga marigold, cenia, begonia, torenia, yellow celosia ug uban pa.
Ang Flower Garden naghatag og panginabuhian sa mga mag-uuma kay gisweldoan sila sa lungsod aron maoy moatiman sa mga buwak.
Tungod sa kanindot sa palibot ug ka colorful sa mga buwak, ang uban dinhi magpahulagway sa ilang pre-nuptial ug kini naay bayad nga P1,000 alang sa upat ka oras.
May upat ka cottages sa garden nga magamit ug tag P150 ang abang sa matag duha ka oras samtang P300 ang kinadak-an. Kini abli matag adlaw, gikan alas 8 sa buntag hangtod alas 5 sa hapon.
Gidili ang pagpamupo, pagpamutol ug pagpangibot sa mga buwak, ang masakpan pamultahon og P2,500.