USA sa pinaka-importanting parte sa atong lawas nga gibaliwala kay lagi di makita mao ang kidney.
Labihan ka importante ang trabaho ini kay mao may mo sala sa hugaw ug sa 120 ngadto sa 150 ka quarts nga dugo para mahimong ihi ug subra nga likido para sa natong lawas.
Matod sa basahon nga Stayhealthy, ang kidney maoy mopugong sa pagpundo sa hugaw sa sulod sa lawas og mo papundo (stable) sa lebel sa electrolytes ug hormones nga nagtabang sa maayong pagdaloy sa pressure sa dugo, apil paghimo og blood cells og pagmintinar sa pagpalig-on sa bukog.
Unsa may buhaton aron malikayan ang pagkadaot ni-ini?
Una, ang pag pugong-pugong sa ihi. Kini makapataas sa pressure sa ihi sulod sa kidney nga maoy maka-ingon sa renal failure or incontinence. Kung kaihion na gali, insigida gilayon sa kasilyas.
Ikaduha mao ang ka kuwang sa tubig sa lawas labi na kadtong di tig-inum og preskong tubig. Kinahanglang matubigan og insakto ang mga kidneys aron makatrabaho. Kung di tig-inum ug makuwangan sa tubig, delikadong magpundo ang hugaw sa dugo nga mopahubas sa kidney.
Sunod ang taas og konsumo o gamit sa asin. Ang kanunay nga pagkaon og parat sama sa hipon ug ginamos maka-pasaka sa pressure sa dugo nga maoy makapa-overwork sa kidney. Ang insaktong gidaghanon sa asin matag adlaw, 5.8 ra gayod sa gramo.
Dayon ang regular nga pag-gamit og mga analgesic kon pain reliever. Ang paspas, segi-segi, taas nga gidaghanon og sayop nga pagtumar ini dunay side effects nga mao say makasamot sa kadaot.
Ang pagkaon og puwa nga karne nga taas og protina maayo apan delikado sab kining makapataas sa mga sakit-sakit sa kidney tungod sa iyang mga byproduct nga protein nga gitawag og ammonia nga mao say makapaluya sa iyang pagtrabaho.
Tumang pag inum og alcohol ug caffeine sama sa mga softdrinks ug soda makapaguba sab di lang kidney, apil ang atay.
Ayaw sab og ibaliwala kung dunay flu unya hilantan, ubhon, magkasakit og tonsillitis og pharyngitis kay mokanaog sab kini sa kidney.