GIPATUMAN na sa Department of Interior and Local Government (DILG) sa lalawigan sa Sugbo ang unom ka buwan nga suspension batok sa mayor, bise mayor, konsehal ug laing duha ka mga opisyal sa kagamhanan sa lungsod sa Barili subay sa penalty sa Office of the Ombudsman sa kasong simple neglect of duty.
Si Jerome Gonzales, provincial director sa DILG Cebu, personal nga ni-serve sa desisyon sa Ombudsman nga nagsuspenso nga way sweldo batok ni Barili Mayor Marlon Garcia, Vice Mayor Teresito Mariñas, Konsehal Sheila Pason, kanhi Human Resource Officer designated Richel Montemayor, ug disbursing officer Salome Alga Merelos.
Apil sa gisuspenso si Gamaliel Riconalla, municipal treasurer, apan ang Department of Finance (DOF) ang mopatuman sa kamandoan tungod kay ubos kini sa iyang responsibilidad.
Alas 1 kagahapon sa hapon, gitunol ni Gonzales kuyog ni DILG Barili local assistant Reynaldo Sosmeña ang kamandoan ngadto sa buhatan sa mayor, ni Mariñas ug Konsehal Jeremias Aguilar magsilbing acting mayor.
Matod sa mayor nga moduso sila og mosyon sa desisyon sa Ombudsman sunod semana diin gihatagan sila og lima ka adlaw sa pagbuhat niini human madawat ang kopya sa kamandoan.
Sigon ni Garcia igo lang siya nituman sa iyang ministerial duty pag-approve isip bise mayor niadtong higayona, 2012, diin base sa record sa Human Resource and Development Office dunay pay nahabilin nga mga adlaw nga maka-leave si Pason.
“Ako ang gisuspenso...Where is justice here? The penalty they apply on us is too oppressive,” padayag ni Garcia dihang nahinabi sa Superbalita Cebu kagahapon.
Iyang gibarogan nga way conspiracy nga nahitabo sanglit wa siya’y access sa executive department.
Ang kaso may kalambigitan sa paglarga ni Pason sa gawas sa nasod diin padayon gihapon kini nagdawat og sweldo ug iyang Representation and Transportation Allowances (RATA) bisan og nahuman na ang iyang pag-leave.
Sa pagkasuspenso ni Garcia ug Mariñas, magsilbing acting mayor si Aguilar, ang ikaduhang miyembro sa Sangguniang Bayan, samtang acting vice mayor si Nelson Gingoyon nga ikatulong konsehal sa lungsod. SCG