SA paglingkod na sa bag-ong tagdumala sa Cebu South Bus Terminal, usa sa gipahugtan niini ang mga koleksyon sa mga kita sa terminal.
Gibutyag ni Jonathan Tumulak, bag-ong terminal manager sa CSBT, nga mihimo siya og gamay nga kausaban sa mga koleksyon.
Usa sa iyang gitug-an nga gikinahanglan na nga moduso og report kabahin sa inadlaw ug binuwan nga mga koleksyon ang mga collector sa kita sa CSBT.
“And then atong gi-monitor ang ilang performance, kon nganong naingon ana ang iyang income, unsay mga problema,” tug-an ni Tumulak sa Superbalita Cebu.
Gikan sa Enero hangtod sa Hulyo karong tuiga, nikanaog og 5.22 porsyento kun kapin sa P2.083 milyones ang kinatibuk-ang kita sa CSBT.
Sa susamang mga buwan sa miaging tuig, nikabat og P39,906,518.01 ang nakolekta nga kita sa terminal.
Sa P37,823,002.49 nga kita karong tuiga, P22,630,450 ang gikan sa toll ug terminal fees, P5,278,230 nakolekta gikan sa taxi stand, P4,567,645 nahipos gikan sa P5 nga bayad sa paggamit sa mga pansayan, P5,346,577.49 sa mga abangan sa mga tindahan sud sa terminal, ug P100 certification fees.
Sa 2017 sa unang pito ka mga buwan, P23.8 milyones sa toll ug terminal fees, P5.4 milyones sa taxi stand, P5.06 milyones sa comfort rooms ug P5.4 milyones sa mga abangan.
Sumala ni Tumulak wala nila isipa nga kabahin sa revenue collection ang paggamit og mga pansayan kay dunay mga higayon nga dili nila pabayron ang mga senior citizen ug kadtong indigent nga mga pasahero.
“Katong gusto mogamit sa CR nga walay P5 unya mosulti lang sila sa atong collectors nga wala koy ikabayad, unya tan-aw sa collector nga indigent siya, nagkalisod, amo siyang hatagan og chance makagamit sa Cr,” dugang ni Tumulak.
Gihingusgan usab nila ang pagpanglimpyo sa palibot sa terminal labi na ang mga pansayan.
Samtang, sigon ni Tumulak ang usa ka bus ug mini bus gitugtan nga mopundo sud sa terminal labing dugay hangtod sa 30 minutos.
Sa pagbiya sa bus nga nagkarga og mga pasahero may bayad kini nga P200 samtang P150 ang mini bus. Ang taxi nga mosud ug mogawas nga naay pasahero may bayad nga P10.
Si Joey Herrera, kanhi terminal manager sa CSBT, unang namahayag nga tungod sa kahuot sa dagan sa trapiko sa habagatang Sugbo, niminos ang gidaghanon sa mga biyahe sa mga bus.
Kaniadto, mo-average og lima ang mga biyahe sa mga bus matag adlaw, apan tungod sa trapik, nikanaog kini sa tulo ngadto sa upat sa matag adlaw. SCG