NAHUMAN na pag-inspection sa Mandaue City Police Office ang dapit sa Barangay Looc diin pagahimuon ang groundbreaking ceremony sa low-rise socialized housing.

Ang kalihukan tambungan ni Presidente Rodrigo Duterte karong Charter Day, Agosto 30.

Matod ni Senior Superintendent Jullian Entoma, hepe sa MCPO, nga ilang gihatag ang resulta sa Presidential Security Group (PSG) aron maplano ang seguridad alang sa maong kalihukan.

Lima ka adlaw human sa gikatakdang pagbisita sa Presidente, si Entoma niingon nga subsub na ang pagpangandam sa kinatibuk-ang pwersa sa iyang buhatan alang sa maong kalihukan.

“Humana mi sa atong ocular inspection and then duna na mi plano kung how many personnel ang atong i-deploy sa area. Normal ra nga mangita og area nga kaplastaran sa other forces in coordination sa atong PSG. Pag-secure sa area, igo ra ming mo-provide sa tawo. We have the initial plan but kung ang PSG nay moingon nga dili mao, mausab gihapon ang plano,” ni Entoma sa Superbalita Cebu.

Apan mamahimo unyang hagit sa kalihukan ang panahon tungod kay kon moinit atol sa adlaw sa groundbreaking sa proyekto nga gipunduhan sa National Housing Authority (NHA), ang dalan paingon sa dapit abugon ug kon mouwan, lapukon sab kini.

Gawas niini, laing hagit sa kapulisan ug PSG mao ang bagang duot sa mga tawo sa dapit nga duol sa dagat.

Gihimo sa MCPO ang ocular inspection sa Barangay Looc sayo ning semanahan uban sa mga operatiba ug laing intelligence sa komunidad.

Nirekomendar ug ni-request na sab og dugang pwersa si Entoma ngadto sa Police Regional Office (PRO) 7 aron makatabang sa seguridad sanglit matod pa ni Entoma nga di niya kabiyaan ang “anti-criminality” nga kampanya sa dakbayan.

May posibilidad sab nga may mga dalan nga sirhan atol sa kalihukan, apan tungod kay matod pa di ganahan ang presidente nga mahasol ang katawhan, ang desisyon sa pagpasira magdepende na sa PSG ug Presidential Management Staff (PMS).

Kahinumduman nga nausab ang mga schedule sa kalihukan sa Mandaue sa pagsaulog sa ika-49 nga Charter Day niini tungod sa pagbisita ni Duterte.

Kini na unya ang ikaduhang higayon nga mobisita ang presidente sa Sugbo ning buwana.