Qoute:
"Gikan dinhi, mitabok ang Pilipinas sa nasud sa Canada aron didto mopalit ug mga helikopter, pero mao gihapon di gusto ang ilang prime minister, kay kuno gamiton lang daw sa pagpatay sa mga Pinoy."
___
BISAN pa sa pagpahimangno sa sekretaryo sa depensa sa Estados Unidos kang Defense Secretary Delfin Lorenzana nga dili mamalit og mga armas sa Russia, padayon nga nag-shopping ang atong defense secretary sa mga dekalidad nga armas sa maong nasud, siyempre sugo sa atong Presidente Rodrigo Duterte.
Dili raba mabasol sa America ang Pilipinas tungod kay sa sinugdanan didto unta kita mopalit og mga armas kanila, pero ang nakadaut, kay gusto man nilang imbestigahan ang Pilipinas labot sa isyu nga extrajudicial killings.
Gikan dinhi, mitabok ang Pilipinas sa nasud sa Canada aron didto mopalit ug mga helikopter, pero mao gihapon di gusto ang ilang prime minister, kay kuno gamiton lang daw sa pagpatay sa mga Pinoy.
Karon nga nag-shopping na ang Pilipinas og mga armas sa Russia, mitanyag na ang America sa ilang F-16 jet fighter, apan wala na... nangluod na ang atong pangulo, karon mabasol ba nimo ang atong presidente kon ngano nga iyang gibalibaran ang America?
Kini nagpamatuod lamang nga si PRRD di na gyod gusto sa America, bisan og unsaon pa kita nila og haylo sa mga dekalidad ug high powered nila nga mga armas, tungod kay duna na’y nasud nga mipasalig nga suportahan ang Pilipinas sa iyang gikinahanglan.
Ang di lang maayo kining plano sa Pilipinas nga adunay joint military exercises tali sa mga sundalong taga Russia, ug sundalong Pilipino, magkagubot ta ani tugod kay hangtud karon wa pa matapos ang kasabutan sa atong atong nasud ug sa America ang Balikatan exercises.
Okay lang tingali og didto pa mamalit og mga armas sa Russia kay gibalibaran man sa America, pero sa joint military exercises sa Russia ug Philippine army, mura'g kita’y nanghagit ug nagpasiugda og kagubot.
Hinaut nga hunahunaon unta pag-ayo sa Pilipinas una kini buhaton.