MOKABAT sa 631 ka mga domestic ug international flights nga mogikan ug motugpa sa Ninoy Aquino International Airport (NAIA) ang nakanselar o kaha na-divert sa laing mga airport gikan sa Biyernes, Agusto 17, hangtod sa Lunes, Augsto 20. Libo ka libong mga pasahero ang na-stranded, nababoy.
Mao kini ang sangpotanan sa pagsira sa NAIA international runway 06/24 human sa pagka-aksidete sa usa ka ayroplano sa Xiamen Air. Ang Aircraft Accident Investigation and Inquiry Board (AAIIB) niingon nga usa ka Boeing 737-800 sa Xiamen Air nitugpa atol sa kalit nga pagbunok sa uwan ug na-slide gikan sa runway sa mga alas 11:55 sa gabii niadtong Huwebes, Agusto 16.
Luwas ang tanang 157 ka mga pasahero ug walo ka mga flight crew. Apan hilabihan ka dako ang kahasol ug kaguliyang sa mga pasahero ang nahimo sa maong hitabo.
***
Alang sa mga kadagkoan sa transportasyon ug sa Manila International Airport Authority (MIAA) namahayag nga ang hitabo usa ka “eye-opener,” maoy nakabuka sa ilang mata sa panginahanglan sa laing runway sa labing dakong airport sa atong nasud.
Ato kining nahisgotan kay ang nahitabo didto sa NAIA mahimong mahitabo usab, simbako lang, sa Mactan Cebu International Airport (MCIA). Busa gikinahanglan nga dunay ikaduhang runway ang Mactan Airport.
Si Kongresista Raul Del Mar sa Cebu City north district, nga nangusog sa paghimo sa ikaduhang runway sa Mactan airport, niawhag nga ang pundo kuhaon gikan sa nahibilin sa P14.4 bilyunes nga gibayad GMR Megawide Cebu Airport Corp. (GMCAC) niadtong 2014 sa ilang pagtake-over sa management ug operation sa maong airport.
***
Ang GMCAC adunay proposal sa padayon nga expansion sa Mactan Airport nga mobalor og $4 bulyunes nga maglakip sa paghimo sa ikaduhang runway ug ikatulong terminal sa maong tugpahanan.
Hinuon mas sayon ang kahimtang sa Mactan Airport kon mahuman na ang uska international airport didto sa Panglao, Bohol. Duol ra kaayo kon ma-divert man gani ang ilang flight. Duha ra ka oras sa fastcraft.