Sugilanon: Maghikog unta si Tisoy

Rodel C. Nuñeza

Maslog, Tabogon, Cebu

IGO lang gyud kong nakahuman og pamahaw diha na si Tisoy sa among tugkaran. Naglingkod sa lantay nga kawayan nga gituyo pagbuhat sa akong amahan aron among kapahulayan kon gusto kaming mopahuway. Hayahay ang maong dapit kay gilibutan kini sa dagkong mga punoan sa kahoy. Sa sulod sa among balay hilabihan kaalimuot. Sin man god ang atop ug wala pay kisame.

Wala ko mahibulong nganong misayo siya kay daan man siyang nagpasidaan kanako nga moanhi siyag sayo, tungod lagi sa iyang mahinungdanon kaayong tuyo kanako. Nagpahimo man god siyag sulat sa gugma, kay iyang ipadala ngadto sa babaye nga maoy nakapapitik sa iyang kasingkasing ug maoy natingban sa iyang gugma.

Maayo ra ba sab mamili ang karaho. Wala gayud ang-anga, ang anak gayud sa kapitan sa among barangay. Si Myrna nga bag-o lang gikoronahan pagka Miss Manaybanay sa among barangay ning bag-o lang natapos nga tinuig namong pangilin.

Nasuod man god ni Myrna si Tisoy, kay mao man kini ang kanunay nilang suguon sa pagsakag mga butong kanang manglamaw sila sa ilang kalubihan kuyog ang mga barkada sa dalaga.

Tungod lagi kay may pagkalasaw man og utok si Tisoy kanunay lang siyang ulo-ulohan sa uban. Itupo gani siya kang Myrna. Matod pa sa uban nga pareson kuno sila si Tisoy ug Myrna, kay kon guwapa si Myrna, guwapo man sab si Tisoy. Apan sa binagol lang, matod pod sa mga maru. Sa tinuoray lang, ngalan ra man ni Tisoy maoy guwapo. Tiaw mo bay, Tisoy! Puyra saway lang, ang nawong ni Tisoy lisod drowingon kay morag kinumot sa agta.

“Unsa na, Gaw, nakahimo kana og sulat?” diretsong nangutana si Tisoy dihang nagkaatubangay na mi. ‘Gaw’ ang among tawag kay di siya gustong tawgog ‘Gwaps.’

“Naa na, uy. Gipamuwawan ko gyud na paghimo kagabii,” nako pa nga milingkod tupad kang Tisoy.

“Maayo hinuon, aron ikahatag mo kini dayon ngadto kang Myrna,” ni Tisoy nga hilabihang lipaya.

Nakapangawot ko sa akong ulo pagkahibawo ko nga ako diay maoy pahatagon sa sulat ngadto kang Myrna.

Human ko katunoli ni Tisoy og kuwarta para kuno pang-esnak, milakaw dayon siya. Nagtihuytihoy pa ang karaho. Milakaw si Tisoy, apan nagbilin usab kini kanako og dakong problema. Naglibog ko kon unsay akong buhaton aron mapadangat ko ang sulat ngadto sa hingtungdan. Kay mauwaw man sab ko kang Myrna. Dili man gani ko makaharong og tan-aw kaniya. Unsaon nga may gusto man sab ko sa dalaga. Kinsa bay dili maibog kang Myrna? Naibog man gani si Tisoy nga lasaw og pangutok, ako pa kaha?

USA ka buntag niana nahikugang na lang ko dihang akong nahibaw-an nga maghikog diay unta si Tisoy nianang milabay nga gabii. Maayo na lang gani kay naabtan kini sa iyang amahan dihang maghigot na unta sa iyang liog ginamit ang nylon cord.

Nahibaw-an ko nga ang hinungdan diay sa paghikog unta ni Tisoy mao ang wala pagbawos ni Myrna sa iyang sulat. Nahiubos diay kaayo si Tisoy kang Myrna kay wala hatagi sa dalaga og bili ang gihalad niyang gugma.

Nakonsensiya hinuon ko pagkasayod ning tanan. Ilabi na sa hinungdan sa paghikog unta ni Tisoy. Ako gayud maoy mabasol kon namatay pa si Tisoy, kay sa pagkatinuod, wala ko man gyud ikahatag ang sulat nga alang unta kang Myrna. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph