Albor: Saaran sa mga vendor

Cesar Albor

Sandiganan

MOLANAT pa niining buwan sa Pebrero ang pag-okupar sa mga vendor diha sa mga stall habig sa Abellana atol sa kapistahan ni Sr. Sto. Niño. Mga vendors misaysay nga wala silay ginansya kay ang ilang halin igo ra sa abangan sa stall ug sa mga tindera nga ilang gisuholan sa mga produkto nga ilang giladlad. Apan wala kini nila igsapayan, mobalik sila sa sunod tuig kay ila man kini nga saaran sa Balaang Sr. Sto. Niño. Dalaygon kining ilang saad kay daghan baya nga mga paningkamot nga nahiuli sa kakawang kay walay panalangin gikan sa kahitas-an.

*****

Daghan tuod ang misaksi sa Sinulog nga gibanabanang 8 milyones apan matod pa sa mga vendor nga pipila lamang ang migahin og pamalit sa ilang produkto nga gibaligya. Maoy gipalabi ang pagdeboto sa Balaang Bata.

Pagkadalaygon gihapon sa ilang gibuhat kay baya ang dakong negusyo mao man ang kaluwasan sa atong kalag. Mahinungdanon ang pag-ampo aron niining atong pagpasilong sa landong sa kalibutan, dili kita mahitumpawak sa sala. Daghan ra bang napandol og nahisukamod ning madanglog og malinglahong katilingban.

GARBO NATO SI CERGE

Takdo nga ika-13 ka adlaw karon human mipanaw sa laing kalibutan ang Sugbuanong si Press Sec. Cerge Remonde. Gone but not forgotten. Gihabulan na siya sa kangitngit apan mianinag ang iyang tingusbawan. Nagpabiling buhi ug wala mapukan ang mga damgo, dili haw-ang kay sa iyang pagtalikod nagpabilin og mga matahom nga handumanan sa iyang kagahapon.

Nakakulit og kasaysayan sa kasing-kasing sa panahon, nakatunol og dakong dungog ug garbo kanamong mga Argawanon ug sa tibuok nasod. Lakip siya nga nakig-indig ni kanhi Undersecretary of Education Narciso Albarracin, kanhi DOTC Sec. Simeon Kintanar, Gen. Galileo Kintanar, kanhi PBA Commissioner Romy Kintanar ug kanhi Chief Justice Hilario Davide Jr. Ambot og garbo ba namo sa Argao ang dako sa CPP-NPA nga si Rolly Kintanar.

Si Junie Gelbolingo, usa sa mga trusted ni Cerge ug akong classmate, nagkita mi atol sa haya ni Cerge sa Malacañang sa Sugbo. Sa dihang among gilingi ang among kagahapon, nahinumdoman namo si Cerge nga among schoolmate nga nahagbong sa kabaw ug didto nasaling-it sa sungay. Sama kanamo ni Junie, si Cerge natawo sa kabos nga mga ginikanan, apan ang kakabos dili babag sa iyang pagkab-ot sa altar sa kalampusan.

Kanimo Cerge, ang kamatayon dili silot, kon dili usa ka dakong gasa. Nakahibawo kami nga ikaw maoy himaya sa Diyos didto sa langit. Sa ibabaw sa imong lubong, nagtapot ang among mga pag-ampo, lakip nga among ihalad ang mga ihalas nga bulak nga mahagdaw sa atong banika sa Argao. Dinuyogan sa mamingawng huni sa huyohoy nga kinabliton sa mahapdos nga handumanan.

(yahoo ID & e-mail add: csa_1156@yahoo.com / cell #: 0905-250-4643)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph