MAKAPAABOT na kita og mas init nga sangka sa ikaduhang distrito sa Syudad sa Sugbo karong nianunsyo na si Mayor Tomas Osmeña nga negatibo na siya sa cancer sa iyang labing ulahing pagpahiling didto sa Estados Unidos.

Samtang ang kampo ni Tomas nagkanayon nga bad news kini alang sa iyang kaatbang alang sa pagka kongresista nga si Atan Guardo, nagpasabot sab kini nga wa nay makababag sa negusyante sa pagbunal og sakto sa mayor.

Click here for stories and updates on the Sinulog 2010 Festival.

Nakaingon ko niini kay sa kadaghan sa isyo karon dinhi sa Syudad sa Sugbo, daw huwap-huwap pa man kining gipanghisgutan sa kampo ni Atan. O basin buotan ra kining negusyante nga naila nga usa ka sportsman. Sports ra kaayo siya.

Nakatandi man gud ko sa klase sa mga isyo nga gihisgutan ni Winston Garcia, ang president ug general manager sa Government Service Insurance System (GSIS) nga maguwang ni Gob. Gwen Garcia, dihang nakighinabi sa pipila ka mga sakop sa media sa miaging Huwebes.

Kay naulahi man ko sa panihapon, igo na lang ko nakadungog niyang naghisgot sa iyang mga panahom kabahin sa South Reclamation Project (SRP) nga gisama niya sa lapok nga gibayran sa Syudad sa Sugbo og P800 milyunes matag tuig.

Sa tibuok siyam ka tuig ni Tomas diha sa City Hall, unsa man kunoy mapakita niya isip mayor? Lapok ug mga saad lang gihapon hangtod karon?

Nagkanayon si Winston nga giusikan gyud ni Tomas ang katuigan nga way klarong kalambuan ang Sugbo gawas niining mga saad nga dunay mamalit sa SRP. Ang P800 milyunes matag tuig dako kaayo nga kantidad nga nahimo na untang daghang mga proyekto alang sa mga kabos.

Wa motug-an ang mayor nga sama sa North Reclamation Project ni Serging Osmeña kaniadto, di kini matukoran og mga dagkong building sulod sa mga 20 ka tuig. Wa pay labot ang mga legal nga problema sa SRP ug kining kabaho sa Inayawan dumpsite.

Kinsa man sab kunoy modayon sa pagbubo og mga investment sa SRP kon ang mga investor pay pabuhaton sa mga kadalanan ug ubang mga infrastructure? Ari na lang sila sa ubang mga syudad sa Sugbo nga paspas nang nangpalambo sa ilang kaugalingon.

Mas maayo pa ang Syudad sa Mandaue kay duna pay mapakita nga mga kalambuan diha sa Mandaue Reclamation kon itandi ni Mayor Osmeña diha sa SRP.

Sukad, wa pa ko makakita ni Atan Guardo nga ingon niadto makabunal kang Mayor Osmeña.

Hinuon, basin lagi kay sa kabuotan ni Guardo nga usa ka sportsman (sports ra kaayo siya kon itandi sa arogante ug may pagka barumbado nga mayor) naikog intawon kini nga dunay cancer ang iyang kaatbang.

Apan karon nga niingon na gyud ang mayor nga naayo na gyud siya basis a labing ulahi nga medical checkup, mahimo na nga mobunal og sakto kining si Atan. Kumbati na, Tan.

***

Nasayran nato gikan sa mga tawo ni Bise Presidente Noli de Castro, nga kuyog ni Winston sa pagpakigkita sa mga sakop sa media, nga niabot na og 41 ang mga semifinalist nga tinun-an sa public high school nga nakaapil sa nasudnong pagpangita sa 4th Vice President Noli de Castro Academic Excellence and Exemplary Leadership Awards.

Si manlalaban Jesse H.T. Andres, hepe sa awards committee ug chief of staff of Vice President Noli “Kabayan” de Castro, nagkanayon nga sa Visayas, ang mga finalist mao sila si Edcel Tejare sa Bacolod City National High School; Carl Leonard Pradera sa Sandingan High School in Loon, Bohol; Sonny Mie Gallo sa Ramon Torres National High School in Bago City; Hyacinth Bangero sa Barotac Viejo National High School, Iloilo; ug Kathy Lois Amores of Cebu City National Science High School.