GITUTOKAN karon sa kapulisan sa dakbayan sa Talisay ang anggulo nga pagdumot ang hinungdan sa pagpusil sa usa ka tag-iya og septic tank business sa barangay Tangke niadtong Huwebes sa kaadlawon.
Si Supt. Henry Binas, hepe sa kapulisan nibutyag nga gisentro karon sa imbistigasyon ang posibling kalambigitan sa mga kanhi empleyado ni Leonides Yap,48 nga maoy responsabli sa iyang kamatayon.
Nasayran sa imbistigasyon nga si Yap bag-ohay lang nga nanaktak og mga empleyado.
Nahibaw-an ni Binas nga usa sa mga sinaligan ni Yap sa iyang negusyo ang nitambag kaniya nga di lang una magduawan sa ilang opisina alang sa iyang seguridad.
Ang biktima magduawan sa iyang opisina matag petsa 8,18 ug 28 matag buwan isip kabahin sa iyang routine.
Si Yap gipusil niadtong Enero 28 ug timailhan nga ang mamumuno duna nay kasayuran sa mga petsa kanus-a magduawan ang negusyante.
Base sa imbistigasyon nagbinugtong ang mamumuno nga niduol sa sakyanan ni Yap alas 3:30 niadtong Huwebes sa kaadlawon ug dayong pamusil.
Ang biktima lang ang gitirahan sa mamumuno ug wa hilabti ang laing tulo ka pasahero nga diha sa sakyanan.
Yano kaayo nga nibiya ang suspek nga nisud sa sudlonon nga bahin sa sityo San Rafael sa barangay ug dayon nahanaw.