NIABOT na kagahapon sa buntag dinhi sa Sugbo ang lawas sa duha ka mga sundawo nga nakalas atol sa pagkahagsa sa Nomad aircraft sa Philippine Air Force (PAF) niadtong Huwebes sa Cotabato city.

Luwan sa C130 Hercules plane ang lawas nila ni Staff Sgt. Jeffrey Gozum ug Staff Sgt. Ianne Christy Llamera sa dihang nitugpa kagahapon sa mga alas 11 sa buntag sa runway sa Mactan Benito Ebuen Air Base (MBEAB) sa dakbayan sa Lapu-Lapu.

Click here for stories and updates on the Sinulog 2010 Festival.

Gisugat og military honors ang mga biktima dayon gidala sa Mactan Air Base chapel sa Pahulayanan Hall ang lawas ni Gozum samtang sa Cebu Rolling Hills gipahiluna ang haya ni Llamera.

Si Ginang Sheilanie Gozum, usa ka magtutudlo nga biyuda ni Gozum nagkanayon nga hangtod karon di pa niya madawat ang gidangatan sa iyang bana.

“Ayaw ko pang tanggapin ang nangyari sa kanya (Gozum),” matod ni Sheilanie, kinsa naghilak samtang nagsud-ong sa haya sa iyang bana.

Kini tungod sa kakalit kaayo sa hitabo.

Si Gozum, 37, anaa na sa iyang 13 ka tuig nga pagserbisyo sa PAF nga nadestino sa 223RD Air Squadron sa MBEAB.

Matod pa ni Sheilanie nga ang PAF maoy niatiman sa tanan nilang kinahanglanon samtang gihaya ang iyang bana ingon man nisaad nga mohatag og scholarship sa pagtungha sa ilang bugtong anak nga nagpangidaron og otso anyos.

Kasamtangan nga wa pa matino ang adlaw sa lubong sa maong sundawo ingon man ang plano nga dad-on sa Sultan Kudarat diin lumad ang banay’ng Gozum.

Samtang nagbakho si Ginang Vicky Llamera nga nisugat sa lawas sa iyang anak nga si Christy.

Siya punay nga nagmahay sa wa damha nga kamatayon sa iyang pinanggang anak.

Ang banay’ng Llamera wa pay desisyon sa adlaw sa paglubong ni Christy.

Ang mga lungon pulos silyado ug gitabunan sa Philippine flag.

Gibutangan kinig mga hulagway sa dihang buhi pa sila.

Pasiunang taho nagkanayon nga sunog na ang mga lawas sa mga biktima human masunog ang abyon sa pagkahagsa sa usa ka subdivision.Ang Nomad plane napagngan sa makina samtang naglupad, matod sa pasiunang taho.