MGA senior citizen sa siyudad sa Sugbo nihangyo sa Commission on Election (Comelec) nga hatagan og usa ka adlaw nga seminar alang sa poll automation.

Kini tungod kay ang mga senior citizen wa pay kasayuran kon unsaon pag-botar sa labing unang computerized election ug nabalaka silang ma-imbalido unya ang ilang boto kay wa namao ang ilang pagbotar.

Gitug-an ni Guillermo Casinillo, pangulo sa Office of the Senior Citizen’s Affairs (OSCA) sa dakbayan sa Sugbo nga daghan sa ilang mga miyembro ang nipadayag sa maong kabalaka maong iyang nahukman nga mohangyo sa Comelec.

Click here for stories and updates on the Sinulog 2010 Festival.

Niadtong Biyernes, nagpadala og suwat si Casinillo kang Atty. Edwin Cadungog, ang election office sa Cebu City South district, aron mohangyo og usa ka adlaw nga seminar alang sa mga senior citizen.

Gisugyot sa OSCA nga himuon ang seminar karong Pebrero 17 sa ala una sa hapon sa Social Hall sa Legislative building sa City Hall diin ang tanang mga president sa senior citizen’s association ang patambungon.

Ang mga president na unya, matod ni Casinillo, ang motudlo na ngadto sa ilang mga miyembro sanglit duna man silay monthly meeting.

“Imparting your knowledge to our senior citizens the new system of voting will surely help us in voting easily without any delay” nagkanayon ang kabahin sa suwat-hangyo ni Casinillo ngadto kang Cadungog.

Laing gihangyo usab sa OSCA ngadto sa Comelec nga ang mga senior citizen sa ground floor lang mo-botar uban sa mga persons with disability (PWD) aron di na sila maglisod pa sa pagsaka sa taas.

Apan si Comelec regional director Rene Buac nipasabot nga di kini mahimo sanglit “by precinct” man gyud ang pagbotar ug wa man gipaagi sa personal capacity sa mga botante.

Matod ni Buac nga ang angayang buhaton sa mga senior citizen mao ang pag-agni sa ilang partylist list nga amendahan ang election law o mopasar og balaod alang niini.

Hinuon niingon si Buac nga sagad sa mga presinto nga naa sa taas mao lang ang sa urban areas sanglit ang mga tunghaan sa probinsiya kutob ra man sa unang ang-ang. (CPL)