PADAYONG gidasig sa mga opisyal sa dakbayan sa Talisay ang katawhan nga makanunayon ang pagpanglimpyo sa palibot aron malikayan ang sakit nga dengue.
Si Konsehal Serrie Restauro, ang pangu sa task force batok dengue nibutyag nga mas gikinahanglan ang pagbantay karong panahona nunot sa way hunong nga pagkatap sa mga lamok nga nagdala sa sakit.
Gawas sa pagpanglimpyo,giangkon ni Restauro nga padayon sab sila nga naggamit og medisina alang sa fogging operation batok sa mga lamok.
Matod ni Restauro nga ang paggamit nila og medisina maoy usa sa mga hinungdan nga menos kaayo ang nangasakit og dengue fever sa Talisay.
Base sa talaan sa Department of Health, ang Talisay maoy dunay pinakagamay og kaso sa dengue komparar sa dakbayan sa Sugbo,Mandaue ug Lapulapu.
Karon lang buwana, duha na ka mga bata namatay sa dengue.
Niingon si Restauro nga ang fogging operation magdepende lang sa mga hangyo sa mga barangay kon gikinahanglan kaayo kini.
Apan gitataw sa konsehal nga mas labing epiktibo gihapon nga paagi aron sa paglikay sa dengue mao ang kanunay nga pagpanglimpyo sa palibot. (VLM)