SUGOD karong adlawa, madawat na sa mga operator ug drayber sa public utility jeepneys (PUJs) sa Central Visayas ang pasiunang fuel subsidy cards nga may sud nga tag P5,000 nga ayuda gikan sa nasudnong kagamhanan gumikan sa epekto sa Tax Reform for Acceleration and Inclusion (Train) Law.
Matod ni Eduardo Montealto Jr., bag-ong director sa Land Transportation Franchising and Regulatory Board (LTFRB) 7, ang cash card nakapangan sa mga operator, kinsa maoy mopahuwam niini ngadto sa ilang mga drayber aron magamit panahon nga sila magpatubil.
Moabot sa 5,320 ka fuel subsidy cards ang pasiunang ihatag sa Department of Transportation (DOTr) karong buntag nga ipaagi sa Land Bank of the Philippines, sa iyang main office sa dan P. del Rosario, siyudad sa Sugbo.
Sa kinatibuk-an, moabot og 12,000 PUJ franchise units ang narehistro sa Central Visayas, 11,000 sa Sugbo, 918 sa Negros Oriental, 903 sa Bohol ug 37 sa Siquijor.
Nihangyo si Montealto sa mga operator nga mohapit una sa ilang buhatan sa North Reclamation Area (NRA) sa dili pa moadto sa LBP ug mokuha sa ilang fuel subsidy cards tungod kay mag-fill up una kini og forms ug maghatag usab sila og instructions unsay sunod nga buhaton.
Ang kwalipikadong franchise holders kinahanglan nga mopresentar og identification cards, 1X1 photo ug rehistro sa ilang sakyanan.
Aron dili maghuot sa banko, naplanohan nila nga unang hatagan ang mga operator kansang mga apelyido nagsugod sa letrang “A” ug “B”.
Si Montealto nipasabot nga ang PUJ operators ug drivers lang ang makadawat ug way labot ang ubang publikong sakyanan labi na ang filcab.
“Sila kasi ang identified sa Train Law. The primary transport system ay PUJ,” dugang sa director.
Ang ayuda ubos sa Pantawid Pasada Program sa nasudnong kagamhanan pinaagi sa DOTr diin matag operator modawat og card nga dunay sud nga P5,000 fuel subsidy nga magamit hangtod sa Disyembre 31 ning tuiga. Dugang P20,000 nga fuel assistance ang madawat sa 2019.
Sigon ni Montealto, sa matag cash card, nakaimprinta ang plate number ug kini kinahanglan nga tan-awon sa attendant sa gas station ug itandi sa plate number nga makita sa PUJ sa higayon nga magpatubil ang drayber.
“So, hindi siya pwedeng magamit sa ibang sasakyan kasi naka-specify doon ang plate number ng PUJ,” sumala ni Montealto sa pakighinabi sa Superbalita Cebu kagahapon.
Ang unang schedule sa pagpanghatag sa mga cash card unang gitakda niadtong Hulyo, apan nauswag tungod nihangyo ang mga opisyal sa transport sector nga tingbon na lang ang paghatag sa fuel subsidy sa P5,000 sa tibuok tuig, inay itag P833 matag buwan.
Ang DOTr nigahin og P977 milyones alang sa P5,000 nga subsidy sa kapin 179 mil ka lehitimo nga mga holder og prangkisa sa tibuok nasod.
Ang subsidy program subay sa Section 82 sa Republic Act 10963 kun Train Law nga nanawagan sa provision sa fuel vouchers sa kwalipikadong mga PUJ franchise holders.