HELLO, Mayor Tomas Osmeña. Kumusta? Nganong dili ka na makig-istorya sa mga sakop sa prensa sa Sugbo? Apil ba sab ang taga kaulohan? Dakong pangutana sa mga sakop sa media kon unsay nakapasuko sa mayor. Ang pag-snub sa media dili paborable kaniya. Dakong posibilidad nga mosumbalik kini sa iyang imahen isip mayor.
Sugod kagahapon, nabag-ohan ang mga sakop sa press nga nag-cover sa mga kalihokan sa Cebu City Hall human wala na mohimo si Osmeña sa press conference nga kanunay ipahigayon sa iyang buhatan.
Walay daghang sulti gawas nga iyang gibutyag nga tubagon ang tanang pangutana, hilabi na sa mga isyu sa ilang panagsungi sa hepe sa Cebu City Police Office (CCPO), karong Septiyembre 9 atol sa “Osmeña Day.” Sa naasoy nga adlaw, si Osmeña ug ang BOPK mopahigayon og thanksgiving party para sa mga kalampusan nga ilang nahimo labina sa P18 bilyones Kawit Island development ug ang pagkuha sa mayoriya sa konseho.
Karon nga mi-snub si Osmeña sa media, dili nato mabasol ang mga taho nga mogawas nga dili patas sa ubang mamahayag human walay habig niya sa istorya, sama sa iyang gihatagan og igong panahon ang mga kontra sa pulitika nga modaut kaniya. Dili ba madihado siya ning bahina?
Apan ang media sa Sugbo anad sa pasikotsikot sa pagkuha sa labing idlas nga detalye sa istorya ug maningkamot nga mogawas nga patas ug lab-as ang kasayoran nga ihatod ngadto sa publiko. Mao kini mandato sa mga reporter o mamahayag ning mantalaan ang pagkuha sa habig sa tanang dunay kalambigitan sa istorya o pangtabo, dili kuwang ug dili sobra.
Ang pag-snub ni Osmeña nagpakita lang kini kon unsa ug kinsa siya. Ang publiko na ang mohubad sa matang niya nga pagka lider sa dakbayan. Apan sa media, ang pag-snub niya dakong hagit ug mabansay ang pagdiskarte sa pag-ugkat sa labing makahuluganong unod sa balita.