Pulis nagduda dalagita, 15, gi-rape una gipatay

LAWAS sa usa ka 15 anyos nga dalagita nga gituohang gilugos una pa gipatay nakaplagan sa kanipaan sa Barangay Owak, Lungsod sa Asturias, Sugbo niadtong Lunes alas 2:30 sa hapon.

Ang lawas ni Jenebeve Entenado, taga Poblacion, Asturias, nagkadugta na dihang nakaplagan ang iyang hubo ang lawas nga nag-ubo sa kanipaan.

Si Chief Inspector Roger Quijano, hepe sa Asturias Police Station nga nahinabi sa Superbalita Cebu, nagkanayon nga duha ka mga mangahuyay maoy nakakita sa lawas ni Entenado.

Sumala pa ni Quijano nga wa nay panty si Entenado ug nagsugod na pagkadugta ang lawas. Duna silay nakit-ang mga samad sa ulo, lawas, mga kamot ug liog.

“Gilugos gyud ni siya kay wala naman iyang panty. Unya dunay struggle makita naa sa iyang kamot nga misukol ni siya unya gituok ug posibling gidakdakag bato,” sumala ni Quijano.

Siya nibutyag nga si Entenado nahanaw niadtong Agusto 24 mga alas 2:00 sa kadlawon human nitambong og diskoral sa Sitio San Miguel, Brgy. Owak.

Gibutyag niya nga nianang Huwebes, Agusto 23, namista uban sa iyang inahan si Entenado. Kuyog usab nila ang iyang mga igsuon ug higala nga nang-diskoral.

Katapusan siyang nakit-an sa Biyernes sa kaadlawon nga dunay lalake nga gikaestorya ug human niini nahanaw na.

Ang iyang pagkahanaw wala gi-report sa kapulisan.

Gikataho nga unang nipauli ang dalagita sa iyang mga kuyog.

Apan nibalik kini sa diskohan human niya mahibaw-i nga nahubog ang iyang inahan sa diskohan.

Si Quijano nagtuo nga dili usa ka tawo ang nihimo sa krimen kon di dunay grupo o gang nga posibling mga adik ang mihimo niini.

Dunay duha ka tawo ang ilang giimbitar niadtong Lunes sa gabii ug gipaubos sa imbestigasyon.

Ang duha maoy uwahing nakit-an nga nakig-estorya sa biktima.

Si Konsehal Joeboy Dumdum, sa Brgy. Poblacion nga nahinabi sa Superbalita Cebu, nibutyag nga napaubos na sa autopsy ang lawas niini.

Gipaabot na lang nila ang resulta sa report sa medico legal.

Ilang gitabangan ang kabanay sa dalaga sa pagpalubong niini kagahapon sa hapon sa ilang public cemetery sa lungsod.