Delos Reyes: Negatibo nga panglantaw

SA MGA pamahayag nga giluwatan ni Senador Antonio Trillanes batok sa kasamtangan nga administrasyon, wala siyay nakita sa mga nabuhat ni Presidente Rodrigo Duterte. Wa tay nadungog ug posible nga iyang pasalamatan bisan gamay ang nabuhat ni Presidente Digong.

Sa pag-ubos sa ihap sa krimen tungod sa makanunayong kampanya kontra sa ilegal nga druga diin daghan ang nangatibway kay misukol kuno sa awtoridad, mas kusog ang iyang singgit ug pag-anib sa mga nag-akusa sa Pangulo nga nakalapas kuno sa Human Rights.

Apan nakadungog ba mo kang Trillanes nga mibatikos sa mga kriminal, mga addict nga hinungdan sa daghang kamatay, kawat ug daghan pang mga krimen sa wa pa milingkod sa Malacanang si President Duterte?

Usa ko sa midayeg kaniya ug sa mga sakop sa Magdalo kaniadto kay nagtoo ko nga ligdong ang iya ug ilang baruganan. Sa iyang pag-apil sa politika abi man nako og iyang iduso ang mga balaudnon nga mopaalibyo sa kahimtang sa kasundalohan apan wala man.

Ang iyang papel karon sa nasud mao ang kanunay nga pagpaghot sa administrasyon ug pag-akusar nga kuno masakiton si Presidente Digong ug dili na tarong ang panghunahuna sa Pangulo.

Sa ilang mga panagway kinsa man ang matarong, si Trillanes o si Digong?

Si President Digong atong makita ug madungog nga magsige og pangasaba, mamalikas sa publiko apan mopasiaw ug mokatawa. Si Trillanes kanunay lang nagmoro mora'g kanunay aborido. Ngano kaha?

Ang sinultihan karon ni Trillanes ug CPP founding chairman Jose Ma. Sison halos magkapareha lang kay pulos negatibo ang ilang panglantaw sa dagan sa nasud ubos sa pagdumala ni Pres. Duterte.

Hinuon angayan sabton sa katawhan nga sila pulos kaatbang sa paghandom nga mokupot sa gahum aron pagdumala sa nasud alang kuno sa katawhan.

Human sa termiko ni Trillanes pagka-senador, magpabilin ba kaha siya sa nasud panahon nga mawala na ang iyang immunity kay mahimo na siyang usa ka yanong lumolupyo sa nasud?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph