GIPASALIG ni Special Assistant to the President (SAP) Bong Go nga tabangan sa gobyerno ang mga namatayan ug nasamdam sa pagbusikad sa bomba sa Isulan, Sultan Kudarat, niadtong Martes, Agosto 28.
Kini ang giingon ni SAP Go atol sa ambush interview sa mga tigbalita human sa iyang pamulong sa opening sa usa ka bangko sa Barangay Villarica, Babak District, Island Garden City of Samal (Igacos), kagahapon sa udto.
“Sa mga biktima, tutulong po ang gobyerno, lahat ay gagawin ng gobyerno para matulungan kayo,” tipik sa gibutyag ni Go.
Gibutyag sab ni SAP Go nga duna na'y mga nailhang suspek ang militar ug kapulisan kung kinsa ang mihimo sa pagpabusikad.
“Meron nang mga na-identified na mga suspects, pero di ko pwedeng sabihin, hayaan na po natin ang mga police at militar tungkol dito,” dugang niya.
Giangkon ni SAP Go nga mga teroristang grupo ang mihimo sa krimen.
“Part pa rin siguro ito sa kagagawan ng mga teroristang grupo... iba't ibang anggulo pa ang tinitingnan ng militar at kapulisan didto,” panapos sa opisyal.
Luyo sa hitabo, wa gihapo'y pagduha-duha si SAP Go, nga moadto sa Sultan Kudarat sa ilang naka-eskedyulnga speaking engagement sa sunod semana.
Sa pinakaulahing kalamboan, mokabat na sa 37 ang naangol ug duha niini ang anaa sa talandugon nga kahimtang samtang duha ang dead on the spot sa hitabo. (Jeepy P. Compio)