Housing gipasigarbo ni Quisumbing sa SOCA

GIPANGHAMBOG ni Mayor Luigi Quisumbing sa iyang ikaduhang State of the City Address (SOCA) nga ang Mandaue maoy labing una sa probinsiya sa Sugbo nga makadawat og low-rise housing project gikan sa national government.

Ang ground breaking sa proyekto gikatakdang himuon karong adlawa sa Brgy. Looc apan sukwahi sa mga naunang taho, nausab ang programa niini ug di na motambong si Presidente Rodrigo Duterte tungod sa seguridad.

Apan sumala ni Quisumbing nga si Duterte gihapon ang manguna sa paglusad ug pagpakita sa disensyo sa proyekto nga pagahimuon sa City Cultural and Sports Complex karong adlawa.

Ang presidente maoy guest of honor sa ika-49 nga selebrasyon sa Charter Day sa Mandaue karong adlawa.

Ang proyekto nga tukuron nahimong posible pinaagi sa tabang gikan sa National Housing Authority (NHA).

“This is not just simply housing as it is known before. This is a housing project under the Balay Program which not only provide housing but dignified and prepared housing para sa tanan,” sumala sa mayor.

Nasuta sa Superbalita Cebu gikan ni Quisumbing nga adunay tulo ka taglima ka andanang housing complex nga tukuron sa P128 milyones nga proyekto sa Brgy. Looc.

Adunay 180 ka units nga may 28 square meters nga floor area matag unit sa proyekto.

“I am also pleased to announce the proposed partnership of the City of Mandaue and the Housing and Land Use Regulatory Board (HLURB) who has committed to finally complete the Looc Housing Project,” matod ni Quisumbing kinsa niingon nga ang laing proyekto makabenepisyo unya sa mga Mandauehanon.

Sa dihang nahinabi sa mga tigbalita, ang mayor niingon nga usa ka higayon sa milabayng tuig, siya ug si Presidente Duterte nagka-uban sa panihapon ug nagkahisgot mahitungod sa mga isyu nga giatubang sa mga urbanized cities ilabi na ang problema sa housing.

Pipila ka buwan ang nilabay, ang mayor nakadawat og tawag ni SAP Bong Go ug nipahibawo nga ni-awtorisar og 1,000 ka housing units sa Mandaue ang presidente di lang para sa mga informal settlers apan lakip na mga kawani sa city hall.

Paambit ni Quisumbing nga nasurpresa siya sa balita.

Ang low-rise housing project nga nahimutang sa Brgy. Looc matod pa alang sa mga nabalidong illegal settlers sa city hall samtang ang NHA ug kagamhanan sa dakbayan nagplano og laing housing project alang sa mga kawani sa city hall didto sa Brgy. Labogon.

Gawas sa housing project, dakong garbo nga gipahibawo sa mayor ang 18 porsiyento nga pagtaas sa tax collection sa dakbayan kompara sa sagad nga 11 porsiyento sa mga nilabayng tuig.

“Our collection has reached P1.4 billion from January to June this year and the city has now cash deposits close to P3 billion,” dugang niya.

Gipasigarbo usab ni Quisumbing ang mga pasidungog nga nadawat sa Madnaue gikan sa Department of Trade and Industry (DTI) ug National COmpetitiveness Council’s Cities and Municipalities Competitve Index.

Nakadawat og upat ka pasindungog ang dakbayan diin duha niini, ang dakbayan nahimong ika-13 sa overall ranking sa competitiveness ug Top 2 sa Most Improved LGUs.

Nipadayag sab ang mayor sa iyang pasalamat sa kapulisan nga dako’g natampo sa 31.9 porsyento nga pag-us-us sa index crime ug sa 14.6 porsyento nga pag-ubos sa crime volume.

Lakip sa espesyal nga gipasalamatan ni Quisumbing mao ang Traffic Enforcement Agency of Mandaue (TEAM)sa istriktong pagpatuman sa trapiko og paghimo og mga comprehensibong traffic plan sa UN Avenue diin adunay gihimo nga proyekto ang DPWH.

Samtang wa pa hingpit magwagtang ang plastik sa Mandaue, apan ang mayor niingon nga sukad sa implementasyon sa kontrobersyal nga plastic ban, di na grabe ang problema sa pagbaha sa Mandaue. JPP