SUD lang sa usa ka semana, hingpit nga nangailo sa ilang mga ginikanan ang upat ka mga batang sakop sa usa ka pamilya sa lungsod sa Pinamungajan.
Niadtong Dominggo sa gabii, gidunggab patay sa duha sa tulo ka mga tawo nga nagtaptap ang ilang inahan.
Sa miaging semana, ang ilang amahan nga nagtrabaho usab sa abroad namatay human giingong naligsan og sakyanan.
Matod ni SPO4 Peter Cuanso sa Pinamungajan Police nga tulo ka mga tawo nga nagtaptap ningsulod sa balay ni Amelita Manayon, 4
Sa pagsulod, gidunggab sa duha ka mga killer si Amelita Manayon, 42, kinsa dead-on-arrival sa tambalanan human tungod sa samad dinunggaban sa tiyan, dughan ug mga kamot.
Usa sa mga killer nidunggab usab kang Escolastica, 56, minyo, bilas ni Manayon.
Si Escolastica nabuhi bisan sa iyang mga samad.
Matod ni Cuanso nga ang duha sa upat ka mga bata mao lay natulog uban sa ilang inahan ug iyaan.
Usa niini nibunal pa og unlan sa usa sa mga killer.
Sa ilang kahadlok ug pagtuo nga patay na ang duha ka mga biktima, nanglayat sila sa bentana ug nangadto sa balay sa ilang silingan.
Tungod sa kangitngit ug kahadlok, wa manggawas sa ilang balay ang mga silingan, gihuwat pa nga mabuntag.
Si Cuanso niingon nga tulis ang nag-unang motibo nga ilang gisubay kay nahanaw na ang P50,000 ni Manayon.
Ang salapi gi-down unta niya og yuta, apan iyang gibawi aron magasto sa lubong sa iyang bana.
Laing gisusi nila mao ang kasungian sa yuta.
Nasayran nila ni Cuanso nga ang bana ni Manayon nga nagtrabaho sa Saudi Arabia namatay ug dad-on usab ang lawas dinhi sunod semana. GPL