GIBUTYAG ni Mandaue City Mayor Luigi Quisumbing nga nakadawat siyag daghang mga hulga sa kinabuhi nunot sa malampusong kampanya sa Dakbayan batok sa iligal nga drugas.
Ang rebelasyon sa mayor iyang gitug-an atol sa paghatag niya sa iyang ikaduha nga State of the City Address sa City Cultural and Sports Complex kagahapon sa buntag.
“We have (received threats). There have been several threats, some through my phone, some have called, some via text, through intelligence sa police kay we have detected for example the presence of several guns-for-hire that they are operating in Mandaue,” ni Quisumbing sa mga tigbalita human sa iyang Soca.
Kini maoy unang higayon nga nibulgar ang mayor kalabot sa mga hulga sukad sa subsub nga kampanya batok drugas.
Sa iyang Soca, siya nagkanayon nga daghang mga tawo nga nabalaka sa iyang seguridad ilabi na iyang pamilya ang nipahimangno kaniya nga mopalit na og bulletproof nga sakyanan.
“They have told me that there are people who will not hesitate to pay to have me killed. People who would not hesitate to kill people, policemen, and others who work against illegal drugs,” ni Quisumbing sa iyang pakigpulong.
“Yes, I often fear for my safety but I will hold my mayorship cheap if I will stop supporting the campaign against drugs. Again and always, City above self,” ni Quisumbing kinsa niingon nga di siya mopalit og bulletproof nga sakyanan.
Gipaniguro sa mayor nga gi-under surveillance na sa kapulisan ang mga drug personality lakip na ang mga gun-for-hire aron di makasakit, di lang niya apan lakip na sa mga Mandauehanon.
Sa dihang gikahinabi sa mga tigbalita human sa iyang Soca, si QUisumbing niingong adunay mga “tawo nga andam mobayad” aron masiguradong mabalik ang ilang “happy days” sa ilang iligal nga aktibidad sa dakbayan.
Paambit ni Quisumbing sa mga tigbalita nga kon ang Philippine Drug Enforcement Agency (PDEA) ug Philippine National Police (PNP) ang pasultion, usa sa mga “pinaka-mahal” nga dapit ang Mandaue sa pagbaligya og drugas.
“For us, we take every precaution possible.Like I said, if somebody wants to kill you, they’ll try to find a way to kill you,” sigun sa mayor.
Nipasumbigay sab ang mayor nga ang PNP na ang mopahibaw unya sa saktong panahon sa pagkatawo sa dagkong mga tawo nga nalambigit sa iligal nga drugas ug sa mga “narcopoliticians” sa Mandaue.
Nabantayan sa mayor nga nisaka ang murder cases sa Mandaue sa milabayng tulo ka buwan.
Matod niya nga niadtong 2017, lima ka kasong pagpatay lang ang natala sa dakbayan ug karong tuiga sa wa pa ang barangay election, adunay mga 5 ngadto sa 6 ka kaso ang natala sa Mandaue.
Apan human sa piniliay sa opisyal sa barangay, nisaka kini ug base sa record sa MCPO niabot na og 17 ka kasong pagpatay.
“We have also seen an increase of the drug activity after the barangay election. That’s why we have to make sure that we continue to be relentless in our fight against drugs,” ni Quisumbing.