MOABOT sa 24 ka sako sa bugas ug nagkalain-laing de lata nga gitouhang suplay alang sa New People's Army (NPA) ang nababagan sa Gingoog City Police Station niadtong Agusto 25, mga alas 9:45 sa gabii, didto sa Barangay Lawit, siyudad sa Gingoog, Misamis Oriental.
Sa pagpangulo ni Police Superintendent Ariel Phillip Pontillas, hepe sa Gingoog City Police Station, niabot kanila ang report gikan sa Intelligence Surveillance Operation ubos sa intelligence unit nga adunay supplay sa NPA ang gitakdang ideliver.
Kauban ang sakop sa Armed Forces of the Philippines, positibong nababagan ang kolor pula nga sakyanan. Ug sa pagsusi niini, nakita sulod sa sakyanan ang mga items nga narekober. Adunay mga dokumento kalabot sa ilang memorandom alang sa pulo sa Mindanao.
Mga food supplies nga mobalor og P50,000 nga gilangkoban og 24 ka sako sa bugas, 300 ka mga de lata nga sud-an, pan ug klase-klaseng pakete sa biskwit, ug gibana-banang moabot sa 15 ka kilo sa bangus ug mga kape.
Niadtong niaging bulan, ubay-ubay sab ka mga pagkaon ang nakalotan sa mga kasundalohan sa area sa Bukidnon, hinungdan nga nagbahad ang kapolisan ug kasundalohan nga kung kinsa man ang misuplay kanila ang papanubagon.
Hugot ang panawagan sa gobyerno ngadto sa walhong grupo nga motahan ug mobalik na sa sabakan sa gobyerno tungod kay ubay-ubay nga programa ang giandam alang kanila.