BUG-AT kaayo ang akusasyon nga gibuhian ni Senate President Juan Ponce Enrile batok kang Senador Manny Villar. Si Enrile nagsulti nga si Villar, karon kandidato pagka presidenti sa Nacionalista Party, misuway "pag-suborno" kaniya.
Sumala ni Enrile nga dihang init na ang isyu sa kontrobersiyal nga C-5 road project ni Villar, giimbitar siya sa senador aron magsultihanay sila sa usa ka kan-anan.
"Manong baka may kailangan ka, baka makatulong ako sa iyo", sumala ni Enrile nga nagkutlo sa gisulti ni Villar kaniya.
Sumala sa Senate president nga kini nahitabo pipila na ka tuig ang milabay. Bug-at nga akusasyon.
Apan daghan ang nagpangutana nganong sa kadugay na nahitabo ang giingong paghanyag og "suhol" nganong karon lang kini gibulgar ni Enrile? Tungod ba kay taliabot ang piliay?
Si Enrile midugang nga andam siya nga pamatud-an ang iyang alegasyon kay duna siya'y kauban nga nakadungog sa hanyag ni Villar.
Mao kini ang rason ngano nga dunay mga tawo nga nagtambag ni Villar nga moatubang didto sa senado ug panalipdan ang iyang kaugalingon gikan sa mga pasangil nga nabulahan siya sa C-5 road project ug sa akusasyon ni Enrile nga gihanyagan siya og suhol.
Dili sab maayo nga ipiyal lamang ni Villar kanila ni Senador Allan Peter Cayetano ug kanhi Kongresista Gilbert Remulla ang pagpanalipod kaniya kay dili kaayo sila tuhoan sa katawhan.
Kun dili matin-aw ni Villar kining isyuha, lagmit mamiligro ang iyang kandidatura. (ely_luciano@yahoo.com)o.com)