USA ka sakop sa Philippine National Police (PNP) gipusil, patay didto sa probinsiya sa Maguindanao.
Ang kapulisan nag-ila sa biktima nga mao si Police Officer 1 Jason Lauban, nadestino sa 15th Regional Public Safety Management Battalion, sa PNP-Autonomous Region in Muslim Mindanao.
Sigun sa taho gikan sa Maguindanao Police Provincial Office nga banda alas 4:30 sa hapon, Enero 29, nagtindog ang biktima duol sa iyang pinuy-anan sa barangay Poblacion, Dalican, Datu Odin Sinsuat apan kalit giduol sa duha ka wala mailhing suspek ug gipusil gamit ang kalibre .45 nga pistola.
Patay dayon si Lauban nga naigo sa iyang dughan ug tiyan samtang ang mga mamumuno tulin nga misibat sakay sa usa ka motorsiklo paingon sa wala matino nga direksyon.
Giklaro ni Bai Aliza, paryente ni Lauban nga mga miyembro sa Moro Islamic Liberation Front (MILF) ang mipatay sa pulis.
Hinuon, gilimod ang akusasyon ni MILF Civil Military Relation Chief Eid Kabalu. Sumala ni Kabalu nga walay kalabutan ang ilang grupo sa pagpatay sa biktima.
Ang kapulisan sa Datu Odin Sinsuat padayong nag-imbestiga aron masuta ang tinuod nga motibo sa pagpatay sa pulis sa ingon nga mailhan ug madakpan ang mga suspetsado. (Edgardo Fuerzas)