USA ka mag-uuma gidagit sa mga armadong lalaki didto sa probinsiya sa Maguindanao.

Ang kapulisan nag-ila sa biktima nga mao si Pandido Angeles, 47 anyos, minyo ug molupyo sa barangay Kuloy, Shariff Aquak.

Base sa taho gikan sa Maguindanao Police Provincial Office, nasuta nga banda alas 8:00 sa gabii, Enero 29, gisulod sa napulo ka mga miyembro sa special Civilian Volunteer Organization (CVO) sa pamilyang Ampatuan ang pinuy-anan sa biktima.

Sumala pa nga gipugos kining gikuha ug gidala ngadto sa wala matino nga dapit.

Matud ni Azallih, igsuon sa biktima nga ang mga mikidnap kang Angeles, armado sa mga tag-as nga matang sa armas ug iya pa kining nadungog nga miistorya og Maguindanaoan.

Sumala pa nga gipasanginlan si Angeles nga mitug-an sa mga otoridad nga kabahin ang giingong mga sakop sa CVO nga nalambigit sa mangilngig nga masaker niadtong Nobyembre 23, 2009.

Hangtud karon, wala pa gyud hikit-i sa mga kabanay ang biktima ug nabalaka sila unsa nay nahitabo sa biktima.

Kahadlok karon ang gibati sa mga sibilyan ilabina kadtong nanimuyo duol sa massacre site nga nagtuong patyon sab sila sa mga armadong CVO, hinungdan nga hangtud karon wala pa sila namalik sa ilang mga bay.

Gimando na ni Maguindanao Acting Governor Bai Nariman Ambolodto ngadto sa kapulisan nga susihon pag-ayo kung unsa gyud ang nahitabo sa mag-uuma o kung buhi pa kini o kaha gipatay na sa mga midagit kaniya. (Edgardo Fuerzas)