USA ka batang lalaki kritikal ang kahimtang sulod sa ospital human nabanggaan og motor atubangan sa usa ka tunghaan didto sa lungsod sa Nabunturan, Compostela Valley Province, Biyernes sa buntag.

Giila ang biktima nga mao si alyas Jess, 4, ug molupyo sa Barangay Poblacion, sa maong lungsod.

Matud sa report gikan sa Nabunturan Munical Police Station nga pasado alas 8:00 sa buntag mitabok sa usa ka pedestrian lane ang biktima atubangan sa Nabunturan Central Elementary School.

Apan nabanggaan ang biktima sa usa ka motorsiklo nga gidrayban ni Glenn Elpidang, molupyo sa Km. 92, Barangay Magsaysay, Nabunturan.

Gikan ang motorsiklo sa siyudad sa Tagum ug pauli na unta sa iyang balay ang drayber sa dihang nahitabo ang aksidente.

Wa nabantayan sa biktima ang motor hinungdan nga nabanggaan siya.

Nahiagum og mga pangos ug bun-og sa kalawasan ang biktima hinungdan nga dali siyang gidala sa Nabunturan Doctor's Hospital.

Apan tungod sa grabing mga samad ug pangos nga nahiaguman sa biktima, gibalhin siya sa Davao Regional Hospital sa siyudad sa Tagum.

Ang drayber sa motor mitahan sab dayon ngadto sa mga otoridad ug gikatakdang pasakaan og kasong reckless imprudence resulting to serious physical injury.

Ang kapulisan sa lungsod sa Nabunturan mihimo na og imbistigasyon sa hitabo. (Marvin Pineda)