DUHA ka mga lalaking nag-drive og motor pulos kritikal ang kahimtang karon sulod sa ospital human nahiagum og mga pangos, bun-og sa kalawasan dihang nagsampok ang ilang gimanehong motor didto sa Purok 3, Barangay Sta. Maria, lungsod sa Nabunturan, Comval Province, Huwebes sa hapon.
Giila ang mga biktima nga mao sila Clint Jason Macabodbod, hamtung ang panuigon, molupyo sa Barangay Mainit, lungsod sa Nabunturan; ug si Jestoni Platon, hamtung ang panuigon ug molupyo sa Purok 3, Barangay Sta. Maria, sa maong lungsod.
Sa report gikan sa Traffic Section sa Nabunturan Municipal Police Station nasayran nga pasado alas 5:30 sa hapon nag-drive sa iyang Suzuki 150 nga motorsiklo nga dunay plate number LO-1010 si Macabodbod gikan sa Barangay Mainit padulong sa Barangay Poblacion.
Samtang si Platon nagmaneho sab sa iyang Honda XRM nga motor nga dunay plate number 4625-LJ gikan sa Barangay Poblacion padulong sa Barangay Sta Maria.
Apan pag-abot sa Purok 3, nagbangga ang duha ka mga motor.
Ang duha ka mga drayber pulos nabalintong, resulta sa paghiagum nila og mga pangos ug bun-og sa kalawasan.
Pulos gipangdala sa Davao Regional Hospital sa siyudad sa Tagum ang mga biktima aron mapatambalan.
Kapulisan sa lungsod sa Nabunturan mihimo na karon og dugang pakisusi sa nahisgutang hitabo. (Marvin Pineda)