ANAA sa Bangkok, Thailand ang usa sa mga labing dako nga naghidgang rebulto ni Buddha sa kalibutan.
Kilid sa nabantog nga Grand Palace, imong maabot ang Wat Pho nga anaa mahimutang sa may Sanam Chai Road ug Maharaj Road.
Kon imong sukdon, ang gitas-on sa bulawanong rebulto ni Buddha moabot ngadto sa 46 metros, ang kahabugon niini gikan sa yuta moabot ngadto sa 15 metros.
Adunay kahabugon nga tres metros ang tiil sa rebulto samtang ang gitas-on niini anaa sa 4.5 metros.
Moabot ngadto sa 108 ka simbolo kalabot ni Buddha ang makita nimo sa mga tiil niini.
Ang posisyon sa rebulto matod pa nihulagway sa pagsud ni Buddha sa “Nirvana” kon ang paraiso sa Buddhismo.
Nasuta ning mantalaan nga ang matag sentro sa tagsa-tagsa ka tiil nirepresentar og chakra o energy point.
Sa pagsud pa lang nimo sa templo, aduna sab kay makitang mga bronse nga mga panaksan dinhi. Kon imo iphon moabot kini ngadto sa 108, kini nagsimbolo sa pagkatawo ni Buddha.
Mahimo kang moitsa og mga sinsiyo sa mga panaksan nga gituohang pangpaswerte ug agig pagtabang sab sa mga monghe sa pagmintinar sa templo.
Apan di lang kini maoy bugtong mga talan-awon nga imong makita sa Wat Pho.
Gawas sa Reclining Buddha sud sa walo ka ektarya nga dapit, aduna sab kini ka mga 91 ka mga stupas, mga shrine, upat ka daghong stupas, hardin ug museum.
Namungigi sa mga mabulukong kolor sa bulawan, mga mosaic sa tiles, bronze ug uban pa ang imong makita dinhi.
Tanang suok sa dapit, maanindot sa hulagway apan giawhag ang mga mobisita sa di pagkiat ug pagrespeto sa mga nangadyi.
Sa Wat Pho sab nimo makit-an ang usa sa mga labing maayo nga tunghaan kon buot kang makat-on og tradisyunal nga masahe sa Thailand.
Dinhi nagsugod og bansay ang mga Thai sa masahe sukad 1955.
Mahimo sab nga mopa-enrol ang mga turista og short o long-term sa kursong traditional Thai Massage.
Abli ang Wat Pho matag adlaw gikan alas 8 sa buntag hangtod alas 5 sa hapon. Ang entrance free anaa sa 100 baht kon P160.