Sa akong pag-abot sa dakbayan, grabe akong nakita nga kabag-uhan. Sugod sa airport hangtud sa kabukirang barangay, ang kalambuan dili mapugngan. Akong gidayeg ang pamunuan ni Mayor Tinnex Jaraula ug Bise Mayor Dongkoy Emano tungod kay ila gayung gihatagan og insaktong pagtagad ang dakbayan.

Sa duha ako ka tuig nga nawala sa dakbayan, nakita nako ang paglambo niini, plastar na ang mga tulay, daghan na nag-abli nga mga negosyo (gikan sa restaurant, hotel ug mall). Dinhi nimo makita nga galambo gayud kita tungod kay kung wala, wala puy mga dagkong negosyante nga mamohunan sa atong dakbayan. Gawas niani, gisugdan na ang bag-ong city hall nga sa Abril puhon ning tuiga balhinan na sa mga empleyado.

Human tuod ang pag-renovate sa tourism hall, airconditioned na kini. Sa dili pa matapos ang administrasyon ni Jaraula, mahuman kini. Maplastar na usab iyang Golden Mile nga project, ang bag-ong Ampi-theater, ang Gaston Park ug ang Water Tower Museum. Dili na man siya modagan apan kahibalo kita nga ampingan kini sa sunod nga mayor ug ipadayon ang dili mahuman nga proyekto tungod kay para man kini sa kalambuan sa dakbayan.

Daghan ang mga batikos tungod kay dili man kauban sa politika. Apan ana man gayud ang politika, mangita gayud og dili maayo aron lamang naay ikalabay. Hinuon ang katawhan man ang maghusga. Gawas sa tanan, ang kahusay ug kalinaw ang namintinar gayud sa dakbayan. Dako kaayo nato kini nga garbo tungod kay giampingan man kini sukad pa sa administrasyon ni Dongkoy Emano. Mao sa piniliay karong Mayo, kita ang maghukom kung angayan ba natong ipadayon ang kalambuan o pulihan sila sa mga tawo nga pinolitika ra ang tuyo.

Sa laing bahin, tukoron dili madugay ang pinakadakong mall sa tibuok Mindanao. Ang Ayala Mall nga atbang sa Gaisano. Kung mahuman na kini, pastilan gayud ang mabulahan nga katawhan niini.

Daghan trabaho ang moabli ug magdako anam ang dakbayan. Dili na gayud mapugngan ang kalambuan nato mao nga kinahanglan magkahiusa kita. Ang kalambuan sa usa ka lugar gikan man kana sa katawhan tungod kay gipili man nila ang mga lideres nga angay moserbisyo usab kanila.

Ang angay nga tutokan sa dakbayan mao gayud ang trapiko tungod kay gakadako kita dayon ang atong trapiko pwerte usab kangil-ad. Dili na kini madala sa mano-mano kay dako na kita nga dakbayan, we have to invest for the future usab.

Dayon ang kahugaw sa kadalanan, nagbalik na ang sagbot sa dalan, kinahanglan usab kini mawala ug insaktong pag-atiman ilabina sa mga merkado nato. Daghan usab street children na, ug dapat kini mawala ug hatagan sa igong pagtagad kay sa ato raman gihapon kini paingon. Ingon niini man gayud ang kalambuan, we have the other side of it.

Daghang salamat ug maayong adlaw!