TUNGOD sa localized thunderstorm, nasinati sa Metro Cebu ang pagbunok sa uwan ug hangin kagahapon sa dayong udto nga gibanabanang nilungtad og labing dugay usa ka oras.
Niresulta kini sa pagbaha sa pipila ka mga dapit sa dakbayan sa Sugbo.
Makapaabot pa ang Sugbo og mga pag-uwan hangtod sa Sabado.
Base sa pag-monitor sa Cebu City Transportation Office (CCTO) lakip sa mga lugar nga gibahaan ang dan Colon, M.J. Cuenco Ave., dan Manalili, dan Junquera, dan Echavez., Imus Road, Basak-Bontores area, Fuente Osmeña, Kinasang-an, Nasipit, Talamban ug dapit sa North Reclamation Area sa Barangay Mabolo.
Gumikan sa baha, naglisod og agi ang ubang mga motorista sa mao nga kadalanan.
Gibutyag ni Cebu City Councilor Jerry Guardo, deputy mayor on infrastructure, nga dunay kasamtangang nagpadayon nga flood control projects sa dagkong mga creek sa siyudad.
Matod niya, gipalawman na ang mga sapa sa Tejero, Lahug, Guadalupe, Kinalumsan River ug Mahiga River duol sa dakong mall.
Sumala ni Guardo, gibanabanang mokabat sa P1.1 bilyones ang pundo sa maong mga proyekto ug dugang P400 milyones alang sa dugang mga proyekto sa pagsulbad sa baha.
Alas 10:40 kagahapon sa buntag, niisyu og thunderstorm advisory ang Philippine Atmospheric, Geophysical and Astronomical Services Administration (Pagasa) Mactan nga nagpahibawo sa localized thunderstorm nga nagpahibawo sa localized thunderstorm nga niepekto sa mga siyudad sa Sugbo, Naga, Talisay, Danao, Mandaue ug Lapu-Lapu ug mga lungsod sa Minglanilla, Balamban, Compostela, Liloan, Consolacion, ug Cordova.
Human sa advisory, nibunok ang uwan nga nagdala og kusog nga hangin ug nasinati ang baha sa nahisgutang mga lugar.
Matod ni Vhan Singson, weather specialist sa Pagasa Mactan, nga gumikan sa tumang kainit sa adlaw sa nangaging mga adlaw, nibanos usab ang uwan.
Ang uwan kagahapon nagdala og four millimeters nga tubig o equivalent sa upat ka milyon nga litro sa tubig uwan sud sa 28 minutos.
Niadtong Agusto 23, natala sa Pagasa sa siyudad sa Lapu-Lapu ang labing taas nga temperatura nga niabot og 35.2 degrees Celsius samtang 42 degrees Celsius ang heat index kun ang sukod sa kainiton sa lawas sa tawo.
Sumala ni Engr. Al Quiblat, pangu sa Pagasa Cebu, sugod karong Dominggo momaayo ang kahimtang sa panahon. Erwin Loregas, USJ-R Intern