USA ka kahera ang gitulis sa wa mailhing mga suspetsadong armado didto sa Barangay Mandapan, lungsod sa New Corella, Davao del Norte, Sabado sa buntag.
Giila ang biktima nga mao si Levelyn Ayucan, hamtung ang panuigon, kahera sa Royce Food Corporation, molupyo sa Purok 4, Barangay Magdum, dakbayan sa Tagum.
Sa blotter gikan New Corella Municipal Police Station nasayran nga pasado alas 9:00 sa buntag nahitabo ang pagpanulis.
Samtang didto nagbantay ang maong kahera sa iyang gitrabahuang tindahan, kalit nga miduol kaniya ang duha ka wa mailhing mga lalaking armado sa wa pa matinong kalibre sa armas.
Sa way paglangan mideklara dayon kini og tulis ngadto sa biktima.
Tungod sa kahadlok nga pasakitan, napugos ang biktima sa pagtugyan sa ilahang halin nga nagbalor og P11,023.00.
Human makuha ang tuyo, mga suspek abtik sab kaayong nakasibat padulong sa wa matinong lugar.
Biktima ang igo na lamang sa pagsumbong ngadto sa buhatan sa kapulisan.
Mga sakop sa kapulisan sa lungsod sa New Corella ang mihimo na og dugang pakisusi sa nahisgutang hitabo.
Samtang hot pursuit operation ang gihimo aron sa paggukod sa mga suspek. (Marvin Pineda)